Me një postim në rrjetet sociale, presidenti amerikan Donald Trump ka reaguar sërish për luftën në Ukrainë, duke kritikuar drejtpërdrejt Vladimir Putinin dhe sulmet ruse ndaj Kievit.
“Unë nuk jam i kënaqur me sulmet ruse në Kiev. Nuk janë të nevojshme dhe koha është shumë e keqe. Vladimir, ndalo! Pesë mijë ushtarë po vdesin çdo javë. Le të mbyllim marrëveshjen e paqes!” shkroi ai në llogarinë e tij personale në Truth Social.
Ky postim vjen në një periudhë tensioni në frontin ukrainas, me sulmet ruse që po shtohen dhe humbjet e jetëve njerëzore që po rriten në mënyrë dramatike.
Moska: Të arritura të gjithë objektivat
Më herët, Rusia deklaroi se kishte përfunduar me sukses një seri sulmesh gjatë natës në disa zona të Ukrainës, duke theksuar se objektivi i sulmeve ishte shkatërrimi i infrastrukturave ushtarake kyçe.
Në një njoftim nëpërmjet Telegram, Ministria e Mbrojtjes ruse foli për një “sulm masiv” nga toka, ajri dhe deti, i cili synonte industri të prodhimit të paisjeve ajrore, raketore dhe hapësinore, si dhe njësitë që prodhojnë sisteme mekanike dhe blinduese. Po ashtu, sipas njoftimit, u goditën instalacione që prodhojnë karburantë për shtytës dhe barut.
“Objektivat e operacionit u arritën. Të gjithë objektivat e parashikuar u shkatërruan,” shkruhej në mesazhin e Moskës.
