Kryeministri Edi Rama tha se nuk është e vërtetë që gjysma e qeverisë së tij është në burg. Ai tha se një pretendim i tillë nga ata që i quan “çyrykë” është “gjëja më fyese” për inteligjencën e tij.
Rama tha se nuk duhet ta ulin kokën pse disa individë në 12 vite në oborrin e shtëpisë të PS kanë patur probleme me drejtësinë.
Përkundër, Rama tha se është më kokëlartë se kurrë, duke arsyetuar se kjo është drejtësia e pavarur për të cilën kishte kërkuar ‘timonin’ në zgjedhjet e 2017.
Rama: Gjëja që është më fyesja për inteligjencën time dhe tonën është kur këta çyrykë dalin dhe thonë si mund të votohet Edi Rama, PS, kur gjysmën e qeverisë e ka në burg. E para kjo është tërësisht e pavërtetë. E dyta, disa individë në 12 vite në oborrin e shtëpisë tonë kanë patur probleme me drejtësinë, kjo është e vërtetë. Është kjo një arsye të ulim kokën? Nga ana njerëzore na shkakton keqardhje. Por nga ana e detyrimeve karshi popullit, kjo mua më bën ta kem kokën më lart se asnjëherë tjetër. Sepse ajo që kam thënë për timonin, për drejtësinë që godet majtas dhe djathtas, është pikërisht kjo që po ndodh me të gjitha problematikat që mund të ketë. Tradhtia e atij premtimi do të ishte sikur sot mos të kishte çuar në hapjen e rrugës për një drejtësi të pavarur, por në një drejtësi që godet vetëm kundërshtarët.
