Kreu i koalicionit “Djathtas për Zhvillim”, Dashamir Shehi, shprehu bindjen se 30% e shqiptarëve do të votojnë ndryshe në zgjedhjet e 11 majit, duke u shkëputur nga partitë tradicionale.
“Ne besojmë se 20-30% e shqiptarëve këtë radhë do të votojnë ndryshe dhe ky është një shans i madh për Shqipërinë, e këtyre më të rinjve se unë”, tha Shehi gjatë një takimi të zhvilluar me qytetarët në zonën e Tregut Elektrik në Tiranë.
I pyetur për numrin e deputetëve që pretendojnë të marrin në këto zgjedhje, Shehi tha: “S’e di. Mund të marrim 1 por mund të marrim edhe 5. Por që pa mandate ne nuk dalim njëherë, ky është realiteti”.
Shehi, ka sfiduar kryeministrin Edi Rama dhe kryedemokratin Sali Berisha, që të ballafaqojnë publikisht programet në një debat televiziv.
Ai shtoi se programi i ‘Djathtas për Zhvillim’ është plotësisht i realizueshëm dhe është i vetmi që e nxjerr ekonominë nga kriza.
“Ne Djathtas për Zhvillim me numrim 9 kemi program për nxjerrjen e vendit nga kriza ekonomike. Në emër të koalicionit sfidoj publikisht partitë e mëdha, PS dhe PD, të ballafaqojmë programet në një debat publik. Jam i bindur se programi jonë është më i mirë dhe plotësisht i realizueshëm”, tha Shehi.
