Banka e Shqipërisë bën të ditur se, ekonomia shqiptare u rrit me 4,1% deri në fund të tremujorit të tretë të vitit.
Sipas BSH-së, kjo rritje ka pasur një bazë të gjerë sipas sektorëve dhe është mbështetur kryesisht nga ecuria e mirë e konsumit dhe investimeve, si edhe performanca e fortë e sektorit të turizmit.
BSH, publikoi sot “Raportin e Stabilitetit Financiar, për 6-mujorin e dytë 2024”, ku theksohet se, “rritja ekonomike u shoqërua me ulje të papunësisë dhe rritje të punësimit e të pagave. Politika fiskale ruajti një prirje konsoliduese gjatë pjesës më të madhe të vitit, në kushtet e rritjes së ndjeshme të të ardhurave fiskale. Ndërsa presionet inflacioniste erdhën në rënie, ndaj Banka e Shqipërisë lehtësoi politikën e saj monetare”.
Gjithashtu, veprimtaria financiare u zhvillua në mënyrë të qëndrueshme.
“Depozitat dhe kreditë u zgjeruan pavarësisht efektit pakësues të mbiçmimit të kursit të këmbimit, kapitalizimi i veprimtarisë mbeti në nivele të mira, ndërsa fitimi i bankave u përmirësua në mënyrë të ndjeshme”, thekson BSH.
Banka Qendrore vëren se, në vijimësi rreziqet për zhvillimet ekonomike dhe financiare në vend mbeten të pranishme dhe lidhen kryesisht me pasigurinë dhe ndikimin që përcjellin zhvillimet ndërkombëtare.
“Në këto kushte, mbetet e rëndësishme që politikat ekonomike dhe financiare të autoriteteve publike dhe veprimet e pjesëmarrësve të tregjeve, të synojnë ruajtjen e rezervave financiare që mbështesin mirëfunksionimin e veprimtarisë së tyre”, thuhet në raportin e BSH.
