Presidenti amerikan Donald Trump ka deklaruar se nuk ekziston një afat i përcaktuar për arritjen e paqes midis Rusisë dhe Ukrainës, ndërsa theksoi se Shtetet e Bashkuara janë “shumë afër” një marrëveshjeje që mund t’i japë fund luftës.
Gjatë një konference për shtyp në Shtëpinë e Bardhë, Trump tha se “po takohemi me Putinin tani ndërsa flasim”, duke iu referuar kontakteve në kuadër të negociatave, përfshirë edhe çështje tregtare dhe tarifore. Ai shtoi se një marrëveshje paqeje është një nga prioritetet dhe se do të dëshironte që ajo të arrihej “sa më shpejt të jetë e mundur”, megjithëse nuk ka një afat zyrtar.
Në të njëjtën kohë, Trump bëri të ditur se një takim me presidentin ukrainas Volodymyr Zelensky është “i mundshëm” këtë të shtunë në Vatikan, ku të dy udhëheqësit pritet të marrin pjesë në funeralin e Papa Françeskut.
Deklaratat e tij përbëjnë një ndryshim të tonit krahasuar me Sekretarin e Shtetit, Marco Rubio, i cili kishte paralajmëruar se SHBA-të do të ndalonin përpjekjet për ndërmjetësim brenda pak ditësh në mungesë të përparimit konkret.
Një ditë më parë, Trump kishte lënë të kuptohej se ka një “afat të vetin” për një marrëveshje mes Kievit dhe Moskës, duke theksuar se të dy palët duhet të ulen në tryezën e negociatave.
Ndërkohë, i dërguari i tij Steve Witkoff zhvilloi sot një takim në Moskë me presidentin rus Vladimir Putin, si pjesë e përpjekjeve diplomatike për zgjidhjen e konfliktit.
