Mbretëria e Bashkuar mbetet një partnere e fortë e SPAK dhe shprehu gatishmërinë për të thelluar bashkëpunimin në vitin 2025.
Ndërprerja e fondeve të SHBA për SPAK pak ditë më parë u prit me “ovacione” nga politikanët në Tiranë të cilët menduan se kjo do të gjunjëzonte Prokurorinë e Posaçme, por gëzimi nuk do të zgjaste shumë pasi Britania e Madhe i ka dhënë mbështetjen e saj të plotë SPAK.
Ambasadori i Britanisë në Shqipëri, Nicholas Abbott ka zhvilluar sot një takim me Altin Dumanin, kreun e Prokurorisë së Posaçme kundër Korrupsionit dhe Krimit të Organizuar (SPAK).
Në prag të zgjedhjeve parlamentare, Abbott vlerësoi përpjekjet e SPAK për hetimin e krimeve zgjedhore dhe theksoi rëndësinë e rolit të tij në mbrojtjen e demokracisë shqiptare.
Diplomati britanik nënvizoi se gjatë pesë viteve të funksionimit të tij, SPAK është bërë një nga institucionet më të besuara në vend dhe gëzon njohje ndërkombëtare. Mbretëria e Bashkuar mbetet një partnere e fortë e SPAK dhe shprehu gatishmërinë për të thelluar bashkëpunimin në vitin 2025.
“Në prag të zgjedhjeve, mirëpresim përpjekjet e SPAK për të mbështetur demokracinë shqiptare përmes hetimit të krimeve zgjedhore. Gjatë pesë viteve të funksionimit të tij, SPAK është bërë një nga institucionet më të besuara në Shqipëri dhe është njohur ndërkombëtarisht si i tillë.
Mbretëria e Bashkuar mbetet një partnere krenare e SPAK-ut dhe pret me kënaqësi bashkëpunimin e mëtejshëm në vitin 2025”, shprehet Abbatt.
