
Trump Junior ka përgënjeshtruar Partinë Demokratike. Postimin në rrjete sociale të Richard Grenell, ku ai i drejtohet Alfred Lelës për të hequr lajmin e cilësuar si të rremë, e ka ripostuar edhe vetë djali i presidentit Trump.
Sipas mediave pranë PD, Trump Jr anuloi takimin me Ramën në Tiranë të lobuar nga Richard Grenell. Ja çfarë shkruan Richard Grenell në postimin e tij të rishpëndarë edhe nga djali i presidentit Trump:
“I dashur Alfred Lela. E kuptoj që jeni disa ditë larg një zgjedhjeje të rëndësishme. E kuptoj që emocionet janë të larta. Zgjedhjet tuaja i kam parë në heshtje nga anash, sepse Shqipëria është një aleate e rëndësishme dhe e besuar e Amerikës në NATO (dhe një nga vendet e mia të preferuara për të vizituar dhe për të pushuar). Por kjo histori nga media juaj është një gënjeshtër TOTALE. Duhet të korrigjohet menjëherë dhe të hiqet nëse ju interesojnë faktet”, thuhet në postim.
Çfarë pretendonte lajmi i mediave pranë PD-së?
Sipas lajmit të shpërndarë më herët nga portalet pranë PD-së, Trump Jr. kishte planifikuar një takim me Kryeministrin Edi Rama në Tiranë, i cili ishte lobuar nga Richard Grenell. Më tej, këto media pretendonin se, pasi njerëz pranë stafit të Presidentit Trump mësuan për përfshirjen e Ramës në axhendë, Donald Trump Jr. anuloi takimin dhe për pasojë edhe vizitën në Shqipëri.
“Në mbrëmjen e së shtunës, më 26 prill 2025, Donald Trump Jr. po darkonte me Aleksandar Vuçiçin në Beograd, si pjesë e vizitës së tij në Evropën Juglindore. Disa javë më parë, ndërsa po planifikonte këtë vizitë, Donald Trump Jr. kishte planifikuar gjithashtu të vizitonte Tiranën, ku do të darkonte me Kryeministrin Edi Rama. Ky organizim u kërkua me ngulm nga Richard Grenell, një lobist i pashpallur për Ramën dhe pothuajse i shpallur për Vuçiçin. Planet e udhëtimit të Trump Jr. u ndryshuan kur persona të afërt me stafin e Presidentit Trump mësuan se Edi Rama ishte përfshirë në axhendë. Sot, Donald Trump Jr. vazhdoi takimet në Budapest, në një konferencë biznesi, duke e hequr Tiranën nga lista e prioriteteve”, shkruhej në lajmin e publikuar më 27 prill 2025 nga Politico.
Ky artikull u publikua nga Trump Jr dhe Grenell në rrjetin social X duke e cilësuar atë të rremë. Ata i drejtohen shefit të komunikimit të PD, Alfred Lela duke i kërkuar të fshijë këtë lajm të rremë që është shpërndarë sipas tij për shkak të fushatës elektorale. Artikulli online në portal u fshi pas reagimeve në SHBA.