Carlos Trujillo, i cili ka shërbyer si ambasador gjatë administratës së parë të Donald Trump, po konsiderohet nga mediat amerikane si një ndër 3 lobistët që kanë shtuar kontratat me klientë të ndryshëm pasi Donald Trump mori mandatin e dytë si President i SHBA.
Trujillo ka krijuar kompaninë e lobimit Continental Strategy, e cila bashkë me Ballard, një tjetër kompani e krijuar nga Brian Ballard, të dy nga Florida po shohin ‘lulëzim’ të bizneseve të tyre.
Së fundmi kompania e Trujillo ka ‘peshkuar’ Partinë Demokratike dhe Sali Berishën, me një kontratë me një vlerë 6 mln dollarë, e cila zgjat dy vite, pra me një përllogaritje të thjeshtë 250 mijë dollarë në muaj.
Kjo kontratë në vlerë monetare është 10 herë më e lartë se ajo që e njëjta kompani ka nënshkruar me Guajanën. Qeveria e Guajanës dëshiron një ndjenjë sigurie, kështu që punësoi një firmë lobimi në Uashington, DC të kryesuar nga Carlos Trujillo me një kosto prej 600,000 dollarë tarifat e kontratës, plus një maksimum prej 180,000 dollarë në vit shpenzime, për të lobuar te Presidenti Trump dhe administrata e tij.
Dhe ky lobim ka të bëjë me faktin se SHBA do të ndërhyjnë ushtarakisht për të mbrojtur Guajanën në rast se ajo sulmohet nga Venezuela.
Një tjetër kontratë e Trujillos është ajo me Qeverinë e Haitit. Referuar dokumenteve që janë paraqitur në Departamentin e Drejtësisë thuhet se firma e tij Continental Strategy ka nënshkruar një kontratë 35,000 dollarë në muaj, me kohëzgjatje 1-vjeçare me qeverinë e tranzicionit të Haitit për të lobuar në emër të saj.
Sipas dosjes, firma “do të përfaqësojë Republikën e Haitit si pjesë e një programi gjithëpërfshirës për: (1) të mbështesë përpjekjet për rimëkëmbje dhe të përmirësojë profilin e Haitit në Shtetet e Bashkuara; (2) të rrisë tregtinë dhe investimet e SHBA; dhe (3) të ndihmojë qeverinë të adresojë përmirësimet e sektorit financiar dhe hapat e tjerë të nevojshëm. Aktivitetet mund të përfshijnë lobim, përgatitjen dhe shpërndarjen e materialeve informative dhe angazhimin e politikëbërësve të SHBA”.
Kontrata u nënshkrua nga kryeministri Alix-Dider Fils-Aimé më 7 shkurt dhe u depozitua nga Trujillo më 24 shkurt – në të njëjtën ditë kur Haiti ishte në mesin e 18 vendeve që ishin në anën e SHBA-së dhe Rusisë në votimin kundër një rezolute jodetyruese të mbështetur nga evropianët në Kombet e Bashkuara që dënonte Rusinë si agresore në luftën e vazhdueshme në Ukrainë.
Dhe referuar dy kontratave, pra me Qeverinë e Guajanës dhe atë të Haitit, marrëveshja që Continental Strategy ka nënshkruar me PD e Berishës me vlerë 6 milionë dollarë është një ‘bingo’. Kjo shumë do të paguhet për dy vjet, pra me një vlerë vjetore 3 mln euro, ose pothuajse 10 herë më e lartë se ajo që Trujillo ka nënshkruar me Qeverinë e Haitit, ose 5 herë më e lartë se ajo me atë të Guajanës.
Tre kontratat janë realizuar në 3 muajt e fundit. Dhe referuar vlerave të lobimit, duket se halli i Berishës apo partisë së tij, qenka shumë më i madh se halli që mund të kenë qeveritë e dy vendeve, të cilët sërish kanë zgjedhur një lobist për të marrë mbështetjen e Trump apo administratës së tij.
