Kryeministri Edi Rama, njëherazi kryetar i Partisë Socialiste, siguroi sot se biznesi i vogël në të gjithë vendin do të mbetet i përjashtuar nga TVSH dhe tatimfitimi deri në vitin 2030.
Gjatë një takimi me mbështetës të PS-së në Petrelë, Rama tha se politika e ndjekur nga mazhoranca e drejtuar prej tij në këto 12 vite për përjashtimin e biznesit të vogël nga taksat ka qenë e suksesshme, pasi ky biznes është fuqizuar.
“Biznesi i vogël do të ketë zero taksa dhe zero TVSH deri në 2029. Nga rritja e pragut të TVSH-së në 100 mijë euro në vit, kemi lënë 98 336 biznese që të përfitojnë në total 66,5 milionë euro në vit, llogariteni që janë më shumë se gjysëm miliardë euro në 10 vite që ju kemi lënë, duke i konsideruar motorë të vetpunësimit dhe aleatë të qeverisë në luftën kundër papunësisë. Nuk ja u kemi marrë, duke i lejuar të bëjnë investime të tjera. Kemi çliruar 123 mijë biznese me xhiro deri 140 mijë euro në vit duke u hequr taksën dhe u kemi kursyer edhe këtu edhe 60 milionë euro të tjera në vit”, deklaroi ai.
Vetëm nga biznesi i vogël, u shpreh Rama, ne kemi hequr dorë nga afro 1 miliard e 200 milionë euro në këto 10 vite dhe këto kanë mbetur te familjet e të gjithë atyre që kanë një biznes të vogël.
“Ndaj dhe biznesi i vogël është rritur e forcuar, ndaj dhe ne deri në 2029 nuk do të vendosim taksa që të vazhdojë të fuqizohet”, ritheksoi Rama.
Rama më tej komentoi edhe deklaratat e opozitës për rikthimin e sporteleve.
“”Bufi i kënetës”, përveç SPAK-ut, më 12 maj thotë se do të fikë edhe e-Albania dhe do të kthejë sportelet. Por numri i shërbimeve që ofrohen në celular apo kompjuter është sot 1252 dhe ka një sërë të dhënash të tjera se sa para, kohë e mund u janë kursyer njerëzve”, nënvizoi Rama.
Më tej, kryeministri foli për investimet e huaja në vend dhe eksportet. Sipas tij, nëse mesatarja e investimeve të huaja në rajon është 6,1%, në Shqipëri është 8%. Po ashtu, theksoi ai, eksportet janë rritur me 3 herë dhe kanë shkuar në 9 miliardë euro.
Rama po ashtu vuri në dukje se shëndetësia dhe mbrojtja sociale janë dy sektorë që kanë marrë financim të konsiderueshëm nga qeveria.
“Buxheti i sektorit të shëndetësisë është 3-fushuar gjatë mandateve të qeverisë socialiste dhe nëse i shtojmë edhe buxhetin e mbrojtjes sociale, jemi në nivelin e 1 miliard eurove”, tha ai. Rama dha detaje edhe sa i takon politikës së pagave, teksa premtoi se paga mesatare e mjekëve do të shkojë në 2 mijë euro në 2030, e mësuesve 1250 euro.
“Pagat mesatare të mjekëve ishin 490 euro, sot janë 1670 dhe synimi ynë është që në 2030 paga mesatare e mjekut të jetë 2 mijë euro. Paga mesatare e mësuesve ishte 420 euro, sot ka shkuar 950 euro dhe projeksioni ynë është 1250 euro në Shqipërinë 2030”, u shpreh Rama.
