Familja tropojane Seci, e cila del garant për pagesën e 6 milionë eurove që synojnë t’i heqin Sali Berishës damkën “non grata” nga SHBA, është futur në radarët e agjencive ligjzbatuese amerikane dhe tashmë edhe të SPAK-ut në Shqipëri.
Në qendër të këtij skandali gjendet Nuredin Seci, ish-punonjës i Post-Telekomit në Tropojë në kohën e diktaturës, sot pensionist në Clifton, Nju Xhersi, i cili pretendohet se është drejtues i fondacionit fantazmë “Make Albania Great Again” (Bëjeni Shqipërinë përsëri të madhe). Ky fondacion fiktiv është mbulesa me të cilën familja Seci pretendon se do të paguajë kontratën e lobimit për Berishën.
Por realiteti i tyre në SHBA është larg filantropisë dhe “dashurisë” për atdheun. Akil Seci, i cili drejton kompaninë e ndërtimit “Seci Construction, Inc” me bazë në Clifton, është tashmë i skeduar nga drejtësia amerikane për aktivitete kriminale financiare dhe mashtrime me partnerë biznesi, investitorë dhe furnitorë. Ai rezulton i arrestuar, gjykuar dhe dënuar nga gjykata penale Bradshaw e shtetit të Nju Xhersit.
Ndërkohë, Valbona Seci, pjesë e të njëjtës familje dhe rrjeti biznesi, është e përfshirë në veprimtari të dyshimta përmes agjencisë së pasurive të paluajtshme “Fair Lawn” (Lëndina e Drejtë), e cila sipas autoriteteve lokale përdoret si platformë “lavatriçe” për pastrimin e parave të ardhura nga aktivitete të paligjshme.
Të dhënat e siguruara deri tani nga burime zyrtare në SHBA flasin për një kompani të zhytur në borxhe dhe mashtrime, që tashmë është pothuajse e falimentuar, ndërkohë që fondacioni i pretenduar është vetëm një emër fantazmë i përdorur për të fshehur burimin real të fondeve që përdoren për lobimin e Berishës.
Në Shqipëri, SPAK ka nisur hetimin, por është e detyruar urgjentisht të bashkëpunojë ngushtë me partnerët amerikanë për të verifikuar nëse fondacioni “Seci”, kompania “Seci Construction, Inc”, dhe agjencia “Fair Lawn” e familjes Seci në Nju Xhersi janë kanalet ku kalojnë milionat e dyshimta, që synojnë të shpëtojnë Sali Berishën nga stigma “non grata”.
Ky skandal që përfshin dosje penale në Amerikë, kompani të falimentuara dhe agjenci imobiliare që shërbejnë si “lavatriçe” për pastrim parash, është një kambanë alarmi e fuqishme për SPAK-un. Verifikimi i plotë dhe transparenca e fondeve është detyrim jo vetëm ligjor, por edhe moral ndaj qytetarëve shqiptarë dhe partnerëve ndërkombëtarë.
Kjo aferë është prova më e qartë se në prapaskenë, Berisha dhe njerëzit e tij vazhdojnë të përdorin kanale kriminale për t’u rikthyer në pushtet. Pyetja që mbetet tani është: a do ketë SPAK kurajën të godasë realisht këtë rrjet të errët që kërcënon demokracinë dhe sundimin e ligjit në Shqipëri? Përgjigjja do jetë testi më i madh i drejtësisë shqiptare përballë mafies politike.
