Drejtuesi politik i PD në qarkun e Tiranës, Belind Këlliçi ka reaguar ndaj akuzave për pagesat prej 6 milionë dollarësh, të cilat kanë ngritur shumë dyshime në media kohët e fundit.
Ai ka hedhur poshtë këto akuza dhe ka sqaruar se nuk ekziston një transaksion nga PD që konfirmon se është kryer kjo pagesë. Këlliçi shpjegoi se kontrata e lidhur për një periudhë 24-mujore, e cila ka filluar më 4 prill, ka një pagesë fikse mujore prej 250 mijë dollarësh. Ai theksoi se kontrata parashikon një mundësi të ndalimit të shërbimit pas muajit të tretë.
“Nuk ka asnjë provë që të mbështesë pretendimet për pagesa të 6 milionë dollarëve. Logjika e kontratës është e thjeshtë dhe e publikuar për çdo person që dëshiron ta shqyrtojë,” tha Këlliçi, duke shtuar se shuma që është paguar për tre muaj është në përputhje me ato që janë parashikuar në marrëveshje.
Këlliçi shtoi se pagesat janë realizuar nga fondacioni “Make Albania Great Again”, i cili ka për qëllim lobimin dhe mbështetje për zhvillimin e vendit. Ai theksoi se këto pagesa janë të ligjshme dhe përputhen me praktikat e zakonshme të lobimit në SHBA.
“Gjithçka është ligjore dhe sipas praktikave të zakonshme të SHBA-së për lobim. Kontrata është transparente dhe të gjitha pagesat janë realizuar në përputhje me ligjet përkatëse”, tha Këlliçi. Në fund, Këlliçi bëri një krahasim mes shumës së paguar për tre muaj dhe kostos së një inceneratori që nuk ekziston, i cili është ekuivalent me një pagesë prej 88 euro në ditë. Ai gjithashtu e krahasoi këtë shumë me një kuti verë “Romano Conti”, të cilën sipas tij, e konsumon kryeministri Rama çdo drekë.
“Kushdo që thotë se janë paguar 6 mln dollarë gënjen. Të nxjerrin një provë të një transaksioni që janë paguar 6 mln dollarë. Mjafton logjika e kontratës që është publikuar në media, që nëse ke dëshirën ta lexosh. Nëse shihni kontratën, është me kohëzgjatje 24 muaj, është lidhur më 4 prill, pra 25 ditë më parë, ka një pagesë fikse mujore prej 250 mijë dollarë dhe ka të drejtë ndalimi të shërbimit fill pas muajit të tretë.
Dhe nëse janë paguar 3 muaj të kësaj kontrate që janë të barasvlerëshme me 8 ditë pagesë të inceneratorit që nuk ekziston, që është 88 euro në ditë apo një koli me verë “Romano Conti” që Rama e pi çdo drekë.. Kjo shumë e paguar për 3 muaj, është paguar nga një fondacion “Make Albania great again” ka objekt të këtij fondacioni dhe lobimin, që e kanë firmosur njerëz që njihen në SHBA, është krejt e ligjshme, praktikë krejt normale në SHBA.”, tha ai.
