Kryetari i Partisë Demokratike, Sali Berisha, ka hedhur akuza të ashpra ndaj Kryeministrit Edi Rama, gjatë një takimi elektoral në Fushë-Krujë. Sipas Berishës, Rama ka shpërdoruar fonde të buxhetit të shtetit, duke udhëtuar me avion qeveritar dy herë më shumë se presidenti i SHBA-së në dy vitet e fundit.
“Edi Rama nuk del dot para jush për të dhënë llogari, sepse e di që ka udhëtuar dy herë më shumë se presidenti i SHBA-së, ka shpenzuar miliona euro për luks, dhe ka vjedhur mbi çdo projekt të realizuar,” tha Berisha, duke akuzuar Ramën për vjedhje në ndërtimin e infrastrukturës dhe shkollave. Ai gjithashtu i referohej 130 milionë eurove të dyshuara të shpenzuara për djegësin në Tiranë, duke e quajtur një skandal të paprecedent.
Në fushatën e tij, Berisha theksoi se Rama po bën fushatë në mënyrën më të vjetruar të mundshme, duke takuar veçmas gratë dhe burrat, një praktikë që ai e krahasoi me vitet ’50 kur komunistët zhvillonin mbledhje të ndara për secilën grupmoshë dhe seks.
“Kjo është fushata e tij – kurse ne vijmë tek ju si njerëz të lirë dhe ju përqafojmë të gjithë. Krenohem me ju, sepse ju keni ardhur këtu nga vullneti juaj, pa u detyruar,” shtoi Berisha, duke theksuar se programi i PD-së do të fokusohet në kthimin e parave të shqiptarëve dhe krijimin e mundësive të reja për të gjithë qytetarët.
Ai u angazhua për një projekt që do të përmirësojë jetesën e pensionistëve shqiptarë dhe do të rrisë mbështetje për fermerët dhe bizneset, duke e akuzuar qeverinë për injorimin e shtresave në nevojë.
“Në vend që të investohet për pensionistët që jetojnë me një pension të qesharëm, Rama ka miratuar një buxhet prej 8 miliardë eurosh, ndërsa për pensionistët ka planifikuar vetëm 16 milionë euro,” tha Berisha, duke kërkuar një ndryshim të menjëhershëm për mirëqenien e të moshuarve.
