Në një fjalim të fortë para qytetarëve të Vlorës, Agron Shehaj u shpreh me vendosmëri se 10 nga deputetët e partisë Mundësia do bëjnë më shumë se ç’do bëjnë 50-60 deputetë të tjerë në Parlamentin e ardhshëm.
Shehaj siguroi qytetarët se Partia Mundësia është forca e vetme që do të çojë në Kuvend shqiptarët e ndershëm që nuk mund të blihen.
“10 nga ne do bëjnë më shumë se ç’do bëjnë 50-60 deputetët e tjerë. Ajo që kam bërë unë në 8 vite në parlament nuk është asgjë në krahasim me atë që do bëjmë ne në parlamentin e ardhshëm. Për herë të parë, shqiptarë të ndershëm që duan t’ia dalin me punë të ndershme në këtë vend, do kenë përfaqësues që nuk do t’i shesin,” deklaroi Shehaj me tone të forta.
Shehaj iu drejtua kritikëve që e konsiderojnë votën për Partinë Mundësia të pavlefshme: “Ata që thonë se vota për Partinë Mundësia shkon dëm, e kanë tmerrësisht gabim. Ju jap fjalën që me ata dhjetëra deputetë që do kemi, nëse ne nuk bëjmë më shumë se gjithë opozita bashkë, ejani e më thoni në sy.”
Shehaj nuk ngurroi të komentojë edhe përpjekjet për të frikësuar mbështetësit e tij: “Na e bënë gogol në fillim, dhe do vazhdojnë të na e bëjnë gogol. Nuk e di nëse e thonë në gjithë Shqipërinë, por në Vlorë është e sigurt që e thonë. Por unë nuk kam asnjë dyshim që ne do ja dalim – dhe më shpejt nga sa mendoja.”
Ai theksoi se partia është e përgatitur për të mbrojtur çdo votë: “Për të gjithë ata që thonë se do na vjedhin votat – ne do jemi aty, mbi çdo tavolinë numërimi. Asnjë votë e Partisë Mundësia nuk do preket. Kemi mbi 1000 vëzhgues në gjithë Shqipërinë – jo vetëm në Tiranë, jo vetëm në Vlorë, jo vetëm në Shkodër, Durrës, Fier, Elbasan, por kudo.”
Në fund, Shehaj bëri thirrje për përfshirje masive: “Ju ftoj të bëheni pjesë e jona, të bëheni vëzhguesit tanë, për të mbrojtur votat tona, për të marrë fatin tuaj në dorë. Sepse ndryshimi do të vijë ditën që ne vendosim të mos presim më, por të veprojmë.”
