Kancelari i sapozgjedhur i Gjermanisë, Friedrich Merz, tha se do t’u bëjë thirrje zyrtarëve të administratës së Presidentit të SHBA-së, Donald Trump, që të ndalojnë ndërhyrjen në politikën gjermane.
“Unë nuk ndërhyra në fushatën zgjedhore amerikane dhe nuk mora një qëndrim në favor të njërës apo tjetrës”, tha Merz, duke folur për rrjetin ZDF.
“Do të doja ta inkurajoja dhe t’i bëja thirrje qeverisë amerikane të mos merret me politikën e brendshme të Gjermanisë dhe të qëndrojë larg këtyre konsideratave partiake”, shtoi 69-vjeçari, i cili tani drejton qeverinë e re të koalicionit kristiandemokrat-socialdemokrat në Gjermani.
Kujtojmë se bashkëpunëtorët kryesorë të Presidentit Trump, përfshirë Elon Musk dhe shefin aktual të Departamentit të Shtetit Marco Rubio, kohët e fundit kanë nxituar të marrin hapur një qëndrim në favor të partisë së ekstremit të djathtë Alternativa për Gjermaninë (AfD).
Friedrich Merz pritet të zhvillojë bisedën e tij të parë telefonike me Presidentin e SHBA-së Donald Trump si Kancelar nesër, të enjten.
