Nga Vitjon Nina
Mbrëmjen e vonë të 7 majit, gazetari Marc Caputo i medias Axios lëshoi një “cicërimë” në platformën X (ish-Twitter), ku bënte me dije se kishte pyetur në Departamentin e Shtetit për rastin e Sali Berishës.
Ai kishte marrë një përgjigje se SHBA-të mund ta lejonin Berishën të vizitonin vendin përtej oqeanit dhe se Washingtoni nuk kishte ndërmend të prishte raportet me një aleate si Shqipëria për shkak të “vendimeve politike të epokës Biden”.
Kështu duke sugjeruar edhe për fillimin e një epoke të re.
Ky postim i Caputos, një gazetar me emër dhe rezyme mbresëlënëse në rangjet e mediave më në zë si Politico, NBC, apo së fundmi Axios, shtron disa pyetje me vend në diskursin më të bujshëm të demokratëve për fushatën e 11 majit.
Së pari, faktin se postimi vjen ditë pas publikimit të një kontrate lobimi 6 milionë dollarësh nga Fondacioni “Make Albania Great Again”, një organizatë jofitimprurëse e sapokrijuar e themeluar nga Nuredin Seci, një kontraktor shqiptaro-amerikan nga New Jersey, në emër të Partisë Demokratike, për t’i hequr përcaktimin non grata liderit të opozitës Sali Berisha.
Së dyti, tempizmin e përkryer dy ditë të plota para mbylljes së fushatës, e cila do të përfundojë zyrtarisht më 9 maj.
Së treti, mënyrën dhe simbolikën e të gjithë zinxhirit të ngjarjeve në kampin demokrat.
Duhet theksuar fillimisht se një publikim i tillë nuk është për t’u marrë lehtë dhe mbi të gjitha nuk mund të pandehet se është një raportim i rremë, për vetë faktin e staturës së Caputo si gazetar, por edhe për faktin se vjen nga një reporter i Axios, i cili ka akses në Shtëpinë e Bardhë si person i akredituar.
Megjithatë, pyetja që Caputo shtron është shumë e përgjithshme dhe përgjigja që ai merr nga DASH, po ashtu.
Departamenti i Shtetit ndërkaq nuk i është përgjigjur menjëherë një kërkese të Albanian Post rreth çështjes.
Axios vetë – edhe pse për shumë nuk është ndër mediat më në zë – ka fituar terren kohët e fundit, veçanërisht për lajmet ekskluzive që sjell nga brenda Qeverisë amerikane, të cilat janë në masë të vërtetuara brenda orësh si të vërteta.
Problemi real, qëndron te lobimi i Berishës dhe se si mund të “njollosë” këtë kartë që ai mundet tashmë ta përdorë.
Faktin se persona të etiketuar si non grata mund të shkojnë në SHBA me ftesa të veçanta nuk e ka mohuar njeri ndonjëherë dhe është një rutinë diplomatike që ndiqet.
Është ndjekur me raste të zyrtarëve të lartë iranianë, apo edhe së fundmi me zyrtarët e lartë rus, të cilët marrin pjesë në takime të Organizatës së Kombeve të Bashkuara, përfshi persona nën sanksione të ashpra si ministri i Jashtëm rus, Sergey Lavrov.
Ndaj, Berisha, gjithnjë ka mundur, në rast të një ftese të veçantë, të shkojë në SHBA me lejen përkatëse.
Problemi që do të shtrohej, do ishte: Kush do ta priste Berishën atje.
Fakti tjetër është se kontrata 6 milionëshe e lobimit është bërë për heqjen e non grata-s, por duket se ajo nuk ka pasur efekt.
Në burime të mirë-informuara, me të cilët Albanian Post ka pasur rastin të kontaktohet, pohohet gjerësisht se është provuar që Berisha përpara zgjedhjeve të 11 majit, të shkojë në SHBA.
Me dy ditë të mbetura para, kjo vizitë ende nuk ka ndodhur dhe duke parë angazhimin e fushatës, koha është e pamjaftueshme.
Ndaj, duhet kuptuar edhe cili problemi ka qenë në këtë mes, ku më i mundshmi është ai i pamundësisë për të pasur një shtrëngim duarsh me zyrtarë të lartë amerikanë.
E mandej aspekti tjetër i postimit të Caputo-s në vetvete. Ai këtë publikimin e boton me të atashuar një tjetër postim, ku është pjesë edhe një botim i Wall Street Journal lidhur me Chris LaCivita, strategun republikan të fushatës demokrate.
Axios vetë, kur ka publikuar kalimin e Caputo-s në radhët e tyre, ka bërë me dije se ai “ka qenë një person thelbësor për këdo që dëshiron të kuptojë Presidentin Trump dhe njerëzit përreth tij”.
Të gjithë rreth tij, si fjala bie LaCivita, ardhja e të cilit ka pasur si qëllim edhe transmetimin e një ideje se administrata Trump, ndryshe nga ajo Biden, afër ka Berishën e jo më kryeministrin Edi Rama.
Por nga ardhja e LaCivita, te pamundësia e heqjes së non grata-s përmes lobimit 6 milionë dollarësh, te vizita e mbetur në tentativë e Berishës në SHBA e së fundmi te postimi i Caputos, lënë në ajër një shije së paku me ndjesi të përziera.
Sepse në fund të ditës, 6 milionë dollarë lobim, mund të kenë përfunduar të jenë shpenzuar vetëm për një “tweet”.
