Arlind Qori, kryetari i Lëvizja Bashkë, ishte i ftuar në emisionin “Të Paekspozuarit” në MCN TV, ku foli për fushatën elektorale, pritshmëritë dhe vizionin e kësaj partie.
Qori tha se kjo ka qenë fushata më e bukur që ka zhvilluar deri sot, duke cilësuar takimet me qytetarët derë më derë si pjesën më thelbësore të saj. Ai tha se pret një rezultat mjaft pozitiv për Lëvizjen Bashkë, ndërkohë që denoncoi faktin që mediat nuk i kanë dhënë hapësirë.
“Nga këndvështrimi i Lëvizjes Bashkë, më është dukur fushata më e bukur, me intensitetin, përkrahjen, solidaritetin, një fryme të re që po lind. Lëvizja Bashkë ka vazhduar të jetë e censuruar, në përjashtim të studios tuaj. Nuk kam patur luksin të refuzoj asnjë debat, madje e kam kërkuar. Televizione të rëndësishme nuk i kanë kushtuar asnjë sekondë fushatës tonë për shkak të qëndrimeve për oligarkët. Këtu dua të veçoj TV KLAN, që është më besnik ndaj oligarkëve. Kjo tregon qëndrimet tona pa kompromis.
Lëvizja Bashkë ka bërë fushatë gjithandej. Kam qenë në shumicën e territorit. Aktivistët tanë kanë bërë fushatë edhe në fshatrat më të largëta. Pres një rezultat shumë të mirë, besoj se do të jemi surprizë e zgjedhjeve. Besoj se rezultati ynë do të jetë më i mirë se ai i vitit 2023”, tha Qori.
I pyetur nga Ylli Rakipi, se përse ai dhe kandidatët e tjerë të Lëvizja Bashkë do të jenë ndryshe nga deputetët e tjerë që kemi parë deri sot, Qori tha se ata janë të ndershëm dhe të guximshëm.
“Unë, Redi Muçi dhe të tjerë, që do të bëhemi deputeë, do të jemi aty si njerëz të ndershëm, të guximshëm, të vendosur, si përfaqësues të interesave, nevojave të shoqërisë. Që artikulojmë, bëjmë luftë politike, që nuk e ngatërrojmë me rrugaçërinë, nuk rrihemi me grushta, por zëri ynë do të jetë i fortë. Në atë parlament, kanë për të ndjerë një sfidë politike, morale dhe intelektuale. Berisha, Rama dhe kushdo të ketë shumicën, nuk do të kenë mundësi të bëjnë siç kanë bërë deri sot. Rama nuk do të ketë më Bershën përpara, por përfaqësues të denjë të shoqërisë, nuk na drejtohet dot si buf. Edhe opinioni të zë me domate pastaj. Do të vërë re kontrastin midis nesh dhe asaj përfaqësie me njerëz të korruptuar, sharlatanë, të paaftë dhe agresivë”, tha Qori.
Lidhur me premtimet për pensionet, Qori tha se Lëvizja Bashkë ka bërë studim, ndërsa Edi Rama hedh premtime dhe batuta pa kriter.
“Më e bukura është Rama për pensionet. Ai thoshte Sude me gjyslyke,. Ne premtonim pension mesatar 330 euro. Doli Rama, tani në autostradë me baner dhe thotë pension mesatar 400 euro. Pra unë paskam qenë Sude… Për të treguar seriozitetin tonë, dhe çfarë neglizhence, përtacie intelektuale. Del Rama dhe këput disa batuta”, tha Qori.
