Koalicioni i të rinjve “Nisma Shqipëria Bëhet” mbylli sot fushatën elektorale në Tiranës. Drejtues dhe kandidatët theksuan rëndësinë e pjesëmarrjes së të rinjve në politikë dhe nevojën për të përmbysur tranzicionin 34-vjeçar. Kreu i koalicionit për Tiranën, Endrit Shabani, theksoi se shqiptarët e kanë treguar hapur vullnetin e tyre në çdo cep të vendit për të votuar ndryshimin. Shabani copëtoi merimangën, që për të është simboli i rrjetës së ngritur nga politika e vjetër, një rrjetë kjo korrupsioni, interesash ekonomikë, nepotizmi etj.
“Jemi mbledhur sot këtu tek ish-stacioni i trenit. Gjatë fushatës kemi shkuar tek ish-stadiumi Dinamo, ish-uzina e traktorëve, ish-Kombinati Tekstil. Kanë 34 vite që ata që e morën vendin i shitën të gjitha dhe ato që nuk arritën t’i shesin, i shkatërruan dhe copëtuan dhe sot kemi mbetur vetëm me ish. Ka nga ata që s’e kanë marrë vesh ende që shqiptarët e kanë vendosur ndryshimin. I ftoj të shkojnë në çdo cep të Shqipërisë dhe të shohin sesi qytetarët do të votojnë ndryshimin”,-tha Shabani.
Nënkryetari i koalicionit, Panajot Soko, theksoi se ekonomia shqiptare i ka të gjitha potencialet të rritet edhe me 10 apo 15%. Ai shtoi se “Nisma Shqipëria Bëhet” kërkon të shembë sistemin korruptiv që ka synim të grabisë xhepat e shqiptarëve dhe t’i çojë ato në xhepat e pak njerëzve që jetojnë në kodër.
