Elmas Bogdani
Nuredin Seci, shqiptaro-amerikani i cili është përfshirë në një kontratë lobimi prej 6 milionë dollarësh për të hequr ish-kryeministrin Sali Berisha nga lista e zezë e SHBA-së është “zhdukur”. Ai ka mbyllur telefonin dhe rrjetet sociale, duke ngjallur një seri spekulimesh dhe interesimi nga mediat ndërkombëtare, përfshirë ato amerikane. “Firma po paguhet nga “Fondacioni Bëje Shqipërinë të Madhe Përsëri,” një organizatë jofitimprurëse e krijuar së fundmi nga Nuredin Seci, një kontraktor shqiptaro-amerikan nga Nju Xhersi, me fonde që supozohet se janë mbledhur nga komuniteti shqiptaro-amerikan.
Seci nuk iu përgjigj pyetjeve mbi fondacionin dhe burimin e fondeve që iu dërguan në llogarinë e tij në Facebook. Numrat dhe adresa e emailit të lidhura me Secin duket se janë ç’aktivizuar”, thuhet në artikullin e Associated Press. Kujtojmë se i vetmi reagim pasi emri tij doli në kontratë, ndodhi disa ditë më parë për emisionin “Opinion”.
I vetmi reagim i Secit
Në një mesazh drejtuar gazetarit Blendi Fevziut, Seci sqaroi se: “Si një biznesmen shqiptaro-amerikan me dashuri të thellë për Shqipërinë dhe për Shtetet e Bashkuara të Amerikës, kam qenë dhe mbetem i përkushtuar ndaj forcimit të marrëdhënieve mes dy vendeve tona. Për këtë arsye vendosa të ofroj mbështetjen time financiare për opozitën shqiptare, me bindjen e palëkundur se përfaqësimi dinjitoz dhe profesional në kryeqytetin amerikan është thelbësor për avancimin e interesave për një Shqipëri demokratike dhe të lirë.
Mbështetja që kam filluar të marr nga anëtarë të komunitetit shqiptaro-amerikan është një dëshmi inkurajuese e ndjenjës sonë të përbashkët për ruajtjen e kësaj lidhjeje të veçantë mes dy vendeve tona. Nga ana tjetër, nuk jam i befasuar nga sulmet e pabazuara dhe përhapja e dezinformatave nga individë dhe grupe që kundërshtojnë Presidentin Trump, kundërshtojnë një Amerikë të fortë dhe nuk përkrahin një Shqipëri të vërtetë demokratike. Qëllimi im ka qenë dhe mbetet i qartë: të mbështes angazhimin e profesionistëve më të kualifikuar në fushën e marrëdhënieve me qeverinë amerikane, ata që e kuptojnë realisht thellësinë e lidhjes historike mes dy vendeve tona, që njohin mundësitë që lindin nga udhëheqja e fortë e Presidentit Trump, dhe që janë të gatshëm të avokojnë me integritet për një të ardhme më të mirë për Shqipërinë.
Si një person privat, kam vendosur të mos bëj më deklarata të tjera publike, ashtu siç nuk kam bërë kurrë asnjë deklaratë për fondacionin tjetër që drejtoj, përmes të cilit ndihmojmë të paktën 44 familje me fëmijë të spektrit autik, në veri dhe jug të Shqipërisë, përkatësisht në Tropojë dhe Tepelenë, dy nga zonat më të varfra të atdheut tim. Theksoj sërish dhe dua të siguroj këdo që e lexon këtë qëndrim timin, se përkushtimi im për të mbështetur Amerikën dhe Shqipërinë do të vazhdojë pa ndërprerje, sa herë që të kem mundësi të jap kontribut për këto dy vende”, tha ai.
Hetimi i SPAK
Prokuroria e Posaçme ka nisur verifikimet për këtë kontratë. Hetimi synon të provoje burimin e parave, mënyrën e pagesës dhe nëse janë zbatuar dispozitat ligjore nga funksionarët e PD. Kontrata e lobimit e Partisë Demokratike në SHBA është firmosur më prill nga sekretari i përgjithshëm i PD, Flamur Noka është bërë me kompaninë Continental Strategy. Vlera e kontratës arrin në 6 milionë dollar, nga të cilat 3 muajt e parë 750 mijë dollarë janë paguar tashmë. Si garant i pagesës së kësaj shume ka dalë shqiptaro-amerikani Nuredin Seci. Kompanina Continental Strategy është një firmë konsulence dhe lobimi me bazë në Shtetet e Bashkuara, e specializuar në marrëdhënie me qeverinë dhe strategji politike.
E themeluar në fillim të vitit 2022 nga ish-ambasadori dhe përfaqësuesi shtetëror Carlos Trujillo, kjo kompani ka lidhje të forta politike me figurat kryesore të Partisë Republikane në SHBA, përfshirë Katie Wiles dhe Senatorin Marco Rubio. Në kontratë thuhet se kompania Continental Strategy bie dakord t’i ofrojë PD-së shërbime të marrëdhënieve me qeverinë në lidhje me këtë fushë shërbimesh si krijimi i marrëdhënieve me aktorë kyç në degët ekzekutive dhe legjislative për të lehtësuar zhvillimin e politikave dhe objektivave të saj elektoral dhe qeverisës.
Në një reagim për mediat të shpërndarë nga Partia Demokratike theksohet se shuma e dakorduar për t’u paguar 6 milionë dollar do bëhet nga një fondacion i krijuar nga shqiptarë të Amerikës me emrin “Make Albania Great Again”. Në harkun e 3 muajve të fundit, kjo është kontrata e dytë që PD-ja nënshkruan me njerëz të afërt të presidentit të SHBA, Donald Trump. Më herët PR-i për fushatën e 11 majit i është besuar kompanisë se Chris Lacivita njëri prej dy strategëve të Presidentit të SHBA në fushatën e zgjedhjeve të fundit presidenciale.
