Sot në Shqipëri po zhvillohen zgjedhjet e përgjithshme parlamentare të 11 majit, ku qytetarët votojnë në 12 qarqe të vendit. Procesi ka nisur në pjesën më të madhe të vendit, por jo pa probleme.
Ndërsa procesi ka nisur në pjesën më të madhe të qendrave të votimit, një incident i pazakontë është shënuar në Vlorë.
Në qendrën e votimit nr. 44/71/2, votimi nuk ka nisur ende për shkak të mungesës së komisionerëve. Dy prej tyre janë larguar për arsye familjare, ndërsa raportohet se kryetari i komisionit nuk ka qenë i pranishëm pasi ka humbur mamanë, një ngjarje që ka ndikuar në mosfunksionimin e qendrës.
Në qarkun e Shkodrës, në zonat e thella malore të Dukagjinit, Kelmendit, Pukës dhe Fushë-Arrëzit, ende nuk ka nisur procesi i votimit. Komisionerët në disa qendra votimi ende nuk kanë mbërritur.
Për shkak të largësisë dhe terrenit të vështirë, procesi zgjedhor ka nisur gjithmonë me vonesë në këto zona.
Qytetarët në qendrën e votimit te shkolla “Dëshmorët e Lirisë” në Tiranë nuk mund të votojnë për shkak të problemeve me pajisjen e identifikimit biometrik.
Janë hapur të gjitha qendrat e votimit në qarkun e Korçës. Ky qark do të përfaqësohet me 10 deputetë, një më pak se zakonisht, ndërsa votimi është organizuar në 7 KZAZ. 17 mijë zgjedhës më pak do t’i drejtohen sot kutive të votimit.
Në burgun e Drenovës është ngritur një qendër e posaçme votimi sipas vendimit të KQZ. Në lista me të drejtë vote janë 220 persona.
Ndërkohë që për herë të parë do të votojnë edhe nga burgu i grave në Pojskë. Janë gjithsej 36 gra me të drejtë vote, ndërsa nuk është ngritur qendër e posaçme, por votueset do të shoqërohen nga forcat e policisë në qendrën më të afërt në Piskupat.
Në qëndrën e votimit në Sovjan ka patur probleme sa i përket nisjes të proçesit zgjedhor. Nuk ka nisur proçesi në kohë për shkak të mosfunksionimit të pajisjes PEI.
Në qarkun e Lezhës, në një nga qendrat e votimit është raportuar një vonesë në nisjen e procesit. Shkak është bërë një pajisje teknologjike e operatorit, e cila nuk ka funksionuar siç duhet, duke krijuar radhë dhe pritje për qytetarët që kanë mbërritur për të votuar.
Komisionerët në vendngjarje po përpiqen të zgjidhin problemin teknik për të vijuar normalisht procesin zgjedhor.
Ndërkohë, në pjesën tjetër të vendit, procesi i votimit po zhvillohet në mënyrë të qetë dhe pa incidente të mëdha deri në këto momente.
Në një qendër votimi në Fier, procesi nuk ka nisur ende, shkak mungesa e kolaudimi i pajisjes së identifikimit. Anëtarët e komisionit janë të ulur në vendet përkatëse dhe pritet nisja e procesit të votimit.
Në lidhje me këtë problematikë është njoftuar edhe Komisioni Qendror i Zgjedhjeve.
E tensionuar ka qenë situata mbrëmjen e djeshme në Dibër, ku një incident ka ndodhur mes grupeve të PS dhe PD.
Pas denoncimit të PD për një mjet që transportonte para dhe tollona nafte, forca të shumta policie rrethuan automjetin dhe kryen kontrolle. U arrestua Esat Gjura, oficer policie, i cili është edhe babai u kandidatit për deputet të PS, Daniel Gjura.
Partia Demokratike pretendon se Esat Gjura qëlloi me armë në fshatin Pilafë, ndërsa tentonte blerjen e votave.
