Sekretari i Përgjithshëm i Partisë Socialiste, Blendi Klosi, gjatë një lidhje direkte për emisionin “Të Paekspozuarit” në MCN TV, parashikoi një përmbysje të frikshme të rezultatit në këtë qark, duke deklaruar se PS beson që mund të arrijë në 4-1.
“Ka një kthim të të gjithë Dibrës majtas. Nga puna që kemi bërë me patronazhistët, jemi të sigurtë 3-2, por kur të numërohet edhe vota e diasporës, mund të shkojmë edhe 4-1. Do të jetë foto finish, do të vendoset në kutitë e fundit, nëse marrim 4. Jemi në garë për mandatin e katërt. Mos harrojmë gara e fundit para dy vitesh, ka patur 40 mijë vota PS, 20 mijë vota përfaqësuesit e PD, nga 60 mijë votues gjithësej… Besoj shkojmë fort në garën për mandatin e 4”, tha Klosi.
I pyetur për rezultatin e votimit elektronik në Vorë dhe njësinë 10 të Tiranës, që KQZ refuzoi ta publikojë sot, Klosi tha se është absurde.
“Investimet janë bërë që të kemi situatë tjetër, të kishim eksperiment se sa shpejtë mund të merret rezultati me votim elektronik. Selia e PS e kundërshtoi, shpresoj të kemi ri-vendimarrje. Preteksti që ndikon në numërim është absurde. Procesi është shumë i monitoruar, është online, nuk ka mundësi për ndryshim rezultati në numërim. Votat janë në kuti. Prandaj është ky proces për të parë diferencën”, tha Klosi.
I pyetur nga analisti Enton Abilekaj lidhur me problematikat që opozita pretendon se kanë shoqëruar zgjedhjet, Klosi deklaroi se për këtë duhen fakte, por PD nuk ka ofruar asnjë.
“Enton e di qëndrimin tuaj, nuk e komentoj, por që të ketë një besueshmëri ajo që thoni ju duhet të sillni fakte. Kundërshtarët ndalojnë makina në rrugë, mbajnë online tv-të katër-pesë orë, u kontrollua makina fije për pe, dhe nuk gjetën asgjë, po zero element që vërtetojnë akuzat e opozitës. Ndodhi sërish dje, asnjë material. E di që duan të krijojnë një alibi, por të paktën një fakt duhet ta japin”, deklaroi ai.
