PS fitoi thellë dhe me rezultat përtej pritshmërive zgjedhjet parlamentare të 11 majit duke u konfirmuar në pushtet për herë të katërt. Socialistët morën 52.3% ose 784 826 vota në rang kombëtar, të cilat përkthehen në 83 mandate në Kuvendin e ardhshëm. PD mbetet sërish në opozitë pasi të dielën mori vetëm 34% të mbështetjes ose 508 961 vota.
Por teksa numërimi brenda vendit ka përfunduar në 5225 qendrat e votimit në të gjithë vendin, te Parku Olimpik i Tiranës po vijon procesi me votat e diasporës.
Deri tani janë numëruar rreth 90 mijë vota të ardhura me zarfe nga jashtë.
Rezultati paraprak mbetet në favor të socialistëve. PS kryeson me 54.1% duke marrë deri tani 51 555 vota. Ndërsa PD ka siguruar 28.4% ose 27 065 vota.
Më poshtë vijnë “Nisma-Shqipëria Bëhet” me mbi 8 mijë vota dhe “Mundësia” me 3.6% të votave të diasporës.
Nisma-Shqipëria Bëhet – 8026 vota (8.4%)
Mundësia – 3396 vota (3.6%)
Ndërkohë, KQZ vendosi të lërë menjanë votat e mbërritura me zarf nga Greqia dhe numërimi i tyre do të bëhet në një moment të dytë. Vendimi erdhi pasi PD kontestoi procesin duke pretenduar parregullsi në administrimin e votave si dhe ka ngritur pikëpyetje sa i takon sigurisë që shoqëroi transportimin e tyre nga fqinji jugor drejt Shqipërisë.
