Kreu i Partisë Demokratike, Sali Berisha, gjatë takimit me shqiptarët në Athinë, theksoi rëndësinë e marrëveshjes së detit që PD e firmosi në maj 2009 gjatë periudhës kur ishte në pushtet, duke e cilësuar atë si marrëveshjen më të mirë që Shqipëria ka bërë ndonjëherë me Greqinë, edhe pse Gjykata Kushtetuese e rrëzoi në vitin 2010 si jokushtetuese.
Ai theksoi se kjo marrëveshje ishte e drejtë dhe e barabartë për të dyja palët, duke u siguruar se asnjëra palë nuk do të humbiste.
Berisha kujtoi se, pas përmbysjes së marrëveshjes nga Edi Rama, që e hodhi poshtë atë, u bë një propozim për të shkuar në Gjykatën e Hagës për të sanksionuar marrëveshjen, një hap që u pranua nga autoritetet greke. Sipas tij, Rama ka bërë një marrëveshje të dështuar pas tre vitesh negociata dhe ka penguar një mundësi historike për marrëdhëniet mes dy vendeve. Ai garantoi shqiptarët se, nëse PD rikthehet në pushtet, marrëveshja për detin do të finalizohet dhe marrëdhëniet mes Shqipërisë dhe Greqisë do të jenë shumë të mira.
Pjesë nga fjala e Sali Berishës:
Mirënjohja ime për ju dhe e çdo shqiptari është e pakufishme sepse ju erdhët këtu dhe një pjesë të mirë të fitimeve tuaja ju i kaluat tek familjet tuaja në Shqipëri.
Ju u bëtë pjesë e rëndësishme e investimeve dhe ndërtimit të Shqipërisë.
Partia Demokratike u themelua në vitet ’90, por ju nuk duhet të harroni se mbështetësi i parë i opozitës shqiptare, mbështetësi i parë i pluralizmit politik në Shqipëri nga arena ndërkombëtare ka qenë Kostandin Mitsotaqis, i cili do të ishte kryeministri i parë që do të takonte lidershipin disa javor të PD-së.
Kostandin Mitsotaqis ishte kryeministri i parë në Europë dhe botë që do të priste në Selanik, Ibrahim Rugovën.
Panorama e marrëdhënieve tona është padiskutim panorama e dy kombeve mike, e dy vendeve mike.
PD në këtë rast dua të theksoj, se marrëdhëniet mes dy fqinjëve nuk janë asnjëherë linare, njohin uljet dhe zbritjet, por në çdo kohë në pushtet, PD me qeverinë e këtij vendi ka njohur një dialog konstruktiv dhe një vullnet për të dialoguar pa asnjë tabu për çdo çështje.
Ky vullnet bëri që në mars 1996 të firmosnim me presidentin e Greqisë, Stefanopullos traktatin e miqësisë dhe bashkëpunimit.
Traktat që u jepte përgjigjen ligjore më të mirë, të gjitha marrëdhënieve mes dy vendeve, probleme që duheshin zgjidhur dhe të ardhmes së shkëlqyer të këtyre marrëdhënieve.
PD po në këtë frymë, rikthyer në pushtet firmosi me autoritetet e këtij vendi, marrëveshjen e detit.
Unë ju them këtu vëllezër dhe motra, ajo është marrëveshja më e mirë që ka firmosur Shqipëria ndonjëherë me fqinjët e saj.
Natyrisht do të ishte absurde që të firmosej një marrëveshje që Greqia të humbiste dhe Shqipëria të humbiste.
Ja pra që ka një marrëveshje kur fitojnë të dy palët dhe nëse kishte marrëveshje që fitonin të dy palët ishte marrëveshja që bëmë ne për zonat ekonomike dhe detin.
Këtë marrëveshje e përmbysi Edi Rama. Jo vetëm e përmbysi marrëveshjen, por kur gjykata e hodhi poshtë, qeveritë greke për hir të së vërtetës e qendrës së djathtë dhe të majtë respektivisht, ramë dakord që të shkonim në Hagë, sepse në Kushtetutë ligji ndërkombëtar mbizotëron dhe të merrnim sanksionim në Gjykatën e Hagës.
Çfarë bëri? Jo tha. Do të bëjmë një marrëveshje më të mirë. U tregua një sharlatan, negocioi tre vite dhe në fund i thotë ministrit të Jashtëm se, nuk e firmosim dot, se kemi një vendim të Gjykatës Kushtetuese.
Ju garantoj ju se ajo marrëveshje me PD-në në pushtet do të finalizohet dhe marrëdhëniet mes Greqisë dhe Shqipërisë do të jenë shumë të mira.
