Presidenti turk Rexhep Tajip Erdogan mirëpriti ministrin e Jashtëm rus Sergei Lavrov në pallatin presidencial në Ankara , ku takimi i tyre zgjati rreth një orë.
Më herët, Lavrov ishte takuar me homologun e tij turk, Hakan Fidan , i cili përsëriti propozimin që vendi i tij të presë negociatat e ardhshme të paqes midis Rusisë dhe Ukrainës dhe theksoi se Ankaraja mbështet iniciativën e SHBA-së për t’i dhënë fund luftës.
“Sot kur lufta hyn në vitin e saj të katërt, ekziston një iniciativë e Shteteve të Bashkuara që synon t’i japë fund luftës përmes negociatave. Kjo është në përputhje me politikën tonë që nga fillimi i luftës. Ne i kushtojmë rëndësi të madhe nismës së re të SHBA-së si një qasje e orientuar drejt rezultateve. Ne besojmë se një zgjidhje mund të arrihet përmes negociatave që përfshijnë të dyja palët.” tha Fidan, duke theksuar se të dyja palët ndërluftuese duhet të marrin pjesë në bisedimet e paqes.
Sergej Lavrov, nga ana e tij, deklaroi se Rusia është e gatshme për negociata për t’i dhënë fund luftës në Ukrainë, por la të kuptohej se Moska do të pushonte armiqësitë vetëm nëse ndonjë zgjidhje paqeje do t’i shërbente qëllimeve të Moskës.
Vizita e Lavrov vjen në përvjetorin e tretë të pushtimit rus të Ukrainës dhe një javë pas udhëtimit të presidentit ukrainas Volodymyr Zelensky në kryeqytetin turk.
