Kryeministri Edi Rama me një tjetër postim në Facebook ka ftuar shqiptarët e Greqisë që nesër të marrin pjesë në panairin e punës që do organizohet në Athinë.
Rama fton shqiptarët të kalojnë në panarin e organizuar në Gazi të Athinës dhe të njihen me mundësitë që ofron Shqipëria sot për punësime. Sipas Ramës, sot Shqipëria ofron punë me paga të larta, taksa më të ulëta dhe është një mundësi për ata të shijojnë aromën e vendit të tyre.
‘Rrugës për Greqi sot. nesër në panairin e punës në Athinë. Dje shqiptarët e Greqisë shkuan për të gjetur një punë matanë kufirit. Nesër Shqipëria sipërmarrëse do të shkojë tek ta për të treguar punët që mund të gjejnë këtej kufirit. Kjo është hera e parë që Shqipëria e punës troket në derën e shqiptarëve të Greqisë për t’u thënë ejani kam punë për ju me paga të arsyeshme, me taksa shumë më të ulëta dhe me të gjitha aromat e vendit amë që aq shumë mungojnë kur je jashtë. Ejani e kaloni të shihemi e të llafosemi nesër me sipërmarrës në fusha të ndryshme për t’ju njohur nga afër me mundësitë dhe për tju njohur me kushtet e kontratave të punës në Shqipëri, pastaj nuk diskutohet gjykoni vetë me qetësi, me urtësi merrni kohë. Si të jetë më mirë për ju.’
Më tej Rama thotë se ky është një moment i rëndësishëm, pasi jemi pranë ëndrrës për të anëtarësuar në Bashkimin Evropian dhe prandaj gjithë shqiptarët e Greqisë meritojnë të kthehen dhe të japin kontributin.
Rama fton edhe që të lëmë mënjanë ndasitë e së shkuarës dhe të bëhemi bashkë për ëndrrën evropiane.
‘Duke i dhënë kështu fund një herë e përgjithmonë poshtërimeve dhe nëpërkëmbjeve të pafundme të gjithë rrugëtimit tonë të mundimshëm në historinë. Kjo është ngritja e dytë e flamurit kombëtar pas asaj të pavarësisë në 1912. Kjo është shpallja e Shqipërisë shtet anëtar i barabartë i familjes së bashkuar evropiane. Kjo është hakmarrja më e ëmbël shqiptare dhe bekimi i të gjithë bijve të shqipes si krijesa të lira dhe përgjithmonë të barabarta të Evropës së bashkuar. Prandaj të gjithë shqiptarëve, atyre të Greqisë dhe atyre të Evropës u them le të harrojmë të gjitha historitë dhe bla bla bla-të e të sotmes, ndasitë dhe partitë dhe le të kapemi dorë për dore dhe le të bëhemi ylli i ri i Evropës së bashkuar.
Duke u bërë më 11 maj fuqia e papërmbajtshme e ëndrrës evropiane të shqipes dykrenare dhe pastaj të tjerat mi lini mua, na i lini ne, shumë shpejt dita që e kemi ëndërruar me shekuj për të qenë pjesë e asaj familje nga ku diell lind atje ku perëndon do të jetë dita jonë, dita e Shqipërisë në Bashkimin Evropian.’
Panairi i punës për shqiptarët e Greqisë do t’i njohë ata me mundësitë e punësimit në Shqipëri dhe do të organizohet në Technopolis, Pire, Athinë (Gazi), prej orës 09:00 të mëngjesit deri në 19:00.
