Koço Kokëdhima është në qendër të një skandali të rëndë që ka tronditur futbollin shqiptar. Në një ndeshje të kampionatit të femrave mes Apolonisë dhe Gramshit, ai, në cilësinë e presidentit të klubit fierak, u fut në fushë në mënyrë skandaloze, duke fyer arbitrat me një fjalor të turpshëm dhe duke i kërcënuar në mënyrë të drejtpërdrejtë.
Ky akt i paprecedent nga një zyrtar i futbollit është një shfaqje e pastër e arrogancës dhe mungesës së respektit ndaj rregullave të lojës. Në vend që të respektonte institucionet sportive, Kokëdhima zgjodhi të vepronte si një gangster, duke treguar hapur se kush vendos rregullat në fushën e lojës.
Ajo që e bën situatën edhe më shqetësuese është mbështetja që ai duket se ka nga Federata Shqiptare e Futbollit. Ndërkohë që raste të tilla duhet të ndëshkohen ashpër, Kokëdhima vijon të mbajë një rol të rëndësishëm në strukturat e futbollit, madje duke pasur edhe një ndikim të drejtpërdrejtë përmes marrëveshjeve të tij me presidentin e FSHF-së, Armando Dukën.
Për ironi, njeriu që ka lidhur emrin e tij me Kategorinë Superiore, përmes sponsorit të kompanisë së tij të internetit “Abissnet Superiore”, në vend që të përfaqësojë një model të mirë për futbollin shqiptar, po e turpëron atë me sjellje të tilla skandaloze.
Ky incident nuk është thjesht një rast i izoluar, por një pasqyrë e qartë e degradimit të sportit në Shqipëri dhe e rrugës së gabuar që ka marrë futbolli shqiptar nën ndikimin e individëve që e përdorin atë për interesa personale dhe për të shfaqur forcën e tyre jashtë çdo norme sportive.
A do të marrë ndonjë masë FSHF ndaj kësaj sjelljeje të turpshme? Apo Kokëdhima do të vazhdojë të sillet si pronari i futbollit shqiptar, i mbrojtur nga pazaret dhe marrëveshjet e errëta? (TemA)
