“Ka gjithnjë e më shumë teknologji në Formulën 1, por janë njerëzit ata që kanë më shumë rëndësi”, kështu thotë Adrian Njuei, projektuesi i famshëm i makinave në F1, i cili është angazhuar në një sfidë të re që prej muajit mars për të ringritur skuadrën Aston Martin.
Të kesh anglezin në ekip do të thotë të parashikosh, të shtysh më tej dhe presidenti Laurenc Stroll e di mirë këtë, pasi u tregua i gatshëm të vërë një shumë të madhe në tavolinë (mbi 30 milionë dollarë në vit) vetëm për ta siguruar atë. Verën e kaluar, miliarderi kanadez mundi konkurrencën nga Ferrari, të cilët ishin shumë pranë ta merrnin, i bindur se në Silverston gjeniu do të vazhdojë të bëjë atë që ka bërë mirë prej 40 vitesh, të fitojë.
Në Formulën 1, ku rreth 1000 njerëz punojnë për një makinë, është e vështirë të mendosh se një person i vetëm mund të jetë ende kaq vendimtar. Megjithatë, me Adrian Njuein funksionon ndryshe. “Sekreti është të jesh krijues”, shpjegon 66-vjeçari britanik. “Unë vij nga një familje artistësh dhe kam vizatuar që kur isha fëmijë. Pastaj, në moshën 10-vjeçare vendosa të bëhesha dizajner. Ndoshta as nuk e dija se çfarë do të thoshte, por që atëherë qëllimi im ka qenë të përdor kreativitetin tim për të shërbyer shpejtësinë, kjo është ajo që më magjeps më shumë”, thotë Njuei. Megjithatë, mjetet mbeten të njëjta si gjithmonë: “Nuk kam pushuar kurrë së përdoruri tavolinën time të punës. Për mua është si të flas, pasi e mëson nuk e harron kurrë dhe unë u rrita duke vizatuar. Sigurisht, mund të përdorja kompjuterin, por do të isha vetëm më i ngadaltë dhe më duhet ta kem të gjithë projektin përpara meje. Në pistë shkruaj ide dhe sugjerime në fletoren time dhe pastaj përpiqem t’i përkthej ato në një vizatim në fabrikë, por e bëj në një mënyrë të veçantë, pothuajse të pakuptueshme, deri në atë pikë sa ndonjëherë as vetë nuk e kuptoj çfarë kam shkruar”.
Aktualisht Aston Martin nuk duket aspak në një moment të mirë. Ekipi anglez ka mbledhur vetëm 14 pikë, ndërsa Fernando Alonso ende nuk ka fituar asnjë pikë dhe po vuan tmerrësisht me makinën AMR25, teksa është me sytë nga Njuei. Por për dorën e gjeniut britanik, Alonso do të duhet të presë edhe pak: “Pata disa biseda me grupin që merret me makinën aktuale, megjithatë, vëmendja ime është përqendruar te viti 2026. Mendoj se është hera e parë që rregulloret të cilat lidhen me shasinë dhe motorin kanë ndryshuar së bashku, një aspekt interesant, por që më tremb pak”, shpjegon britaniku. Shkurt, për të ndryshuar “marsh”, nevojiten zgjedhje të guximshme: “Mund të mos jem një nxitës tifozësh ose një nga ata trajnerët e futbollit amerikan, por kjo nuk do të thotë që nuk mund të marr vendime të rëndësishme kur është e nevojshme”, sqaron Njuei, teksa më tej shton: “Në momente të caktuara, duhet të jesh në gjendje t’i thuash një inxhinieri: po shkon në drejtimin e gabuar. Ndalo!”.
Kush e di nëse do të pendohen te Red Bulli, ku vazhdojnë ta minimizojnë largimin e Njueit, duke përsëritur se ekipi vlen më shumë se individi. “Është e vërtetë, kishim një grup fantastik, por edhe një nga tunelet e erës më të këqija”, thotë ish-projektuesi i Red Bullit fitues, një problem me të cilin Njuei nuk do të duhet të përballet te Aston Martin, ku do të ketë ambiente të teknologjisë së fundit. “Laurenc Stroll ka bërë një punë të jashtëzakonshme në ndërtimin e bazës të Silverston. Është më i miri në të gjithë Formulën 1”, konfirmon Njuei. Një faktor shumë i rëndësishëm, por jo i mjaftueshëm, sipas tij: “Unë besoj shumë më tepër te njerëzit sesa te mjetet. Dua ta ndihmoj këtë ekip të rritet dhe nëse dimë të punojmë mirë, rezultatet do të vijnë. Por nuk duhet të ëndërrojmë me sy hapur: duhet të jemi realistë dhe ta ndërtojmë të ardhmen tonë me durim”, shprehet Njuei, cili shfaqet më i motivuar se kurrë dhe shumë i uritur për të tjera suksese: “E dua këtë sport. E dua punën. E dua idenë e zgjidhjes së problemeve komplekse së bashku. Kjo është ajo që më motivon vërtet çdo ditë”, përfundon projektuesi britanik, i cili ka një qëllim të qartë për të ngritur në majë makinën “Aston Martin”.
