Presidenti i SHBA-së, Donald Trump, ka pohuar se administrata e tij po i mban premtimet e saj ndaj komunitetit mysliman dhe është “i angazhuar në diplomaci të pamëshirshme për të krijuar një paqe të qëndrueshme në Lindjen e Mesme”.
Trump i bëri këto komente të enjten teksa organizoi darkën vjetore të Iftarit në Shtëpinë e Bardhë, ku falënderoi gjithashtu “qindra mijëra myslimanë-amerikanë që e mbështetën” atë në zgjedhjet presidenciale të 2024-ës.
“Ndërsa jemi në muajin e shenjtë islamik të Ramazanit, më lejoni të filloj duke u thënë miqve të mi myslimanë – Ramadan Mubarak”, tha Trump.
Në ngjarjen e Shtëpisë së Bardhë morën pjesë udhëheqës të komunitetit mysliman, diplomatë dhe zyrtarë qeveritarë.
“Komuniteti mysliman ishte aty për ne në nëntor dhe ndërsa unë jam president, do të jem aty për ju,” tha ai gjatë një fjalimi të shkurtër përpara vaktit.
“Unë mendoj se ju e dini këtë.” “Çdo ditë, ne po i mbajmë premtimet tona ndaj komunitetit mysliman. Administrata ime është e angazhuar në diplomaci të pamëshirshme për të krijuar një paqe të qëndrueshme në Lindjen e Mesme, duke u mbështetur në Marrëveshjet historike të Abrahamit, për të cilat të gjithë thanë se do të ishin të pamundura. Tani, ne do të fillojmë t’i plotësojmë ato, siç e dini, Biden nuk bëri asgjë për t’i plotësuar ato,” u tha Trump mysafirëve të tij.
“Ne kishim katër vendet e mëdha dhe asgjë nuk ndodhi, pavarësisht nga rëndësia e marrëveshjeve të Abrahamit. Por kam një ndjenjë që do të plotësohet shumë shpejt. Është tashmë. Njerëzit po flasin tashmë për të. Ata duhet të kishin pasur shumë kohë më parë. Duhet të ishte bërë.” “Gjithçka që duam është paqe,” shtoi ai më vonë.
Marrëveshjet e Abrahamit janë një seri marrëveshjesh që u nënshkruan midis Izraelit dhe disa vendeve arabe gjatë presidencës së mëparshme Trump për të normalizuar marrëdhëniet.
Darka erdhi ndërsa lufta në Lindjen e Mesme midis Izraelit dhe Hamasit vijon pas një armëpushimi të brishtë, të ndërmjetësuar nga SHBA, Katari dhe Egjipti.
“Çdo ditë gjatë muajit të shenjtë, muslimanët agjërojnë nga agimi deri në muzg, duke thelluar fokusin e tyre në lutjen dhe përkushtimin ndaj Zotit. Pastaj muslimanët në mbarë botën bashkohen me familjet dhe miqtë çdo natë dhe falënderojnë të Plotfuqishmin, duke e prishur agjërimin e tyre me darkën e iftarit. Të gjithë jemi duke kërkuar paqe për të gjithë botën”, tha ai.
Në vitin 2018, Presidenti Trump organizoi darkën e tij të parë të iftarit për të festuar muajin e shenjtë mysliman të Ramazanit.
