Kryeministri Edi Rama ka prezantuar sot kandidatët për qarkun e Elbasanit për zgjedhjet parlamentare të 11 majit.
I shoqëruar nga drejtuesit politikë dhe lokalë në qark, si dhe skuadra e kandidatëve për deputetë, ai mori takim me grupin e të rinjve, para të cilit bëri edhe prezantimin me një mesazh të fortë publik për rigjenerimin e PS-së, pasi edhe në Parlamentin e ardhshëm pothuajse 60% e ligjvënësve të majtë do jenë fytyra të reja.
“Simbolikisht ky format thotë edhe diçka që është përtej emrave që u prezantuan që PS është një hapësirë ku është koha për t’i dhënë gjithnjë e më shumë zë atyre që janë më të rinj, vajzave dhe djemve që vijnë nga gjithë rrugët e jetës, qendra apo periferia, qyteti apo fshati dhe kanë dëshirë të thonë fjalën e tyre dhe këmbënguljen që të dëgjohen për fjalën që thonë.
Jam i lehtësuar që pas një përpjekje jo të shkurtër, kemi arritur që ti japim shqiptarëve kudo ku janë, çdo qarku një mundësi zgjedhje që nuk e ka patur më parë, duke i dhënë përmes kësaj skuadre edhe një ide të qartë se cila do të jetë jo vetëm skuadra jonë përfaqësuese e mandatit të 4 po cila do të jetë PS e 2030. Një nga deputetët do të jetë Bora, po kini parasysh që 4 vite më parë, Bora ishte si një prej jush që konkurruan për Deputeti të duam dhe nuk shkoi në kuvend, megjithatë nisi një rrugëtim dhe sot vjen pas një eksperience ne një rrugë të nisur nga një aplikim, me shpresën se ishte një mundësi.
Të jeni të bindur se mundësitë e shtuara janë sot qëllimi im më i madh në mënyrën si PS duhet të kryejë me sukses kalimin e stafetës nga një gjeneratë te tjetra. Evisi, një politikane me përvojë sot, e ka nisur këtë rrugëtim si një pedagoge, mosbesuese në fillim se mund të përfshihej në politikë dhe si Evisi janë edhe të gjithë të tjerët, që sot janë në pozita drejtuese edhe në qeveri. Sot është koha për të përgatitur kalimin e stafetës. Duke zgjedhur PS I japim mundësinë shqiptarëve të zgjedhin partinë më të re, me më shumë eksperiencë.”, tha ai.
