Analisti Andi Bushati debatoi në emisionin “Të Paekspozuarit” në MCN TV, me Jorida Tabakun, për mbështetjen që deputetja e PD-së i ka dhënë SPAK-ut. Sipas Bushatit autokracia e Ramës nuk është e shkëputur nga mbështetja ndërkombëtare dhe drejtësia e re, që Tabaku nuk e denoncon, ndërsa deputetja iu përgjigj se në SPAK ka prokurorë edhe të kapur, por edhe të guximshëm.
Pjesë nga debati
Andi Bushati: Nuk jam dakord me këtë, temën për të diskutuar për programin. Pse? Jam dakord me denoncimin e investitorëve strategjikë, etj. Por për programin, sikur PD do të fitojë, i hedhim karamele të helmuar atyre që shohin. Për progame flitet në demokraci. Këta kanë zero shanse, do ti masakrojnë.
Jorida Tabaku: Nuk është e vërtetë.
Andi Bushati: Kur nxjerrim copën e kuqe demi niset gjithmonë, por ne nuk veprojmë si demë. Më shumë se programin e një PD-je të nesërme, ajo që do të më preokuponte mua, është si ndeshemi me një regjim autokratik. Këtu është pyetja ime. Jeni sot në zgjedhje dhe keni privilegjin që t’ju votojnë ndryshe nga lista e mbyllur. Unë mendoj se regjimi autokratik shqiptar, mbahet edhe mbi dy shtylla: drejtësia e re, SPAK, GJKKO, dhe e dyta, mbështetja ndërkombëtare për të mbajtur një regjim autokratik. Tani, Jorida Tabaku shkon në zgjedhje. Një votues i opozitës pyet, pse ta votoj, kur ajo thotë jam me SPAK-un. Edhe sondazhet më ediramiste, votuesit e PD janë kundër SPAK. E dyta, pse ta votoj Jorida Tabakun, kur nuk e kam dëgjuar njëherë të thotë, ç’është kjo Yuri Kim që i thotë demokratëve do të hani bar nëse mbani Berishën? Nëse denoncojmë autokracinë e Ramës, nuk e shohim dot të shkëputur nga mbështetja ndërkombëtare dhe e drejtësisë së re, që ju nuk i denonconi.
Jorida Tabaku: Për këtë kemi patur debat. Që të kesh mendim ndryshe nga ju, nuk është herezi.
Andi Bushati: Padyshim.
Jorida Tabaku: Sa mundësi dhe fuqi kemi, ne e denoncojmë në hapësirat ndërkombëtare pushtetin e kapur. Mendoj se në SPAK ka prokurorë edhe të kapur, por edhe të guximshëm. Kanë çuar Veliajn për një çështje ta caktuar, po pres akoma ta çojnë për gjithcka ka bërë. Kam thënë dhe i qëndroj.
Andi Bushati: Bravo që besoni te SPAK, por votuesi opozitar nuk beson.
Jorida Tabaku: Për mua testi janë inceneratorët dhe se ku do të shkojë SPAK për inceneratorët. Po organizohet dëgjesë në Parlamentin Europian dhe do t’i ngrejmë këto çështje atje. Unë kam fjalorin tim, ju keni tuajin.
Andi Bushati: Ky është narracion dhe jo konkluzion. Ju besoni te SPAK? Jeni kundër shumicës së votuesve.
Jorida Tabaku: Besoj se ka disa prokurorë të guximshëm dhe ka të tjerë të kapur politikisht, ky është qëndrimi im. Kjo është deklarata ime. I kam thënë shumë herë. Kam përshtypje të ka ngecur kaseta te 2021. Për mua SPAK ka test inceneratorët.
Andi Bushati: Ju pa kaluar këtë testin e inceneratorëve e keni shpallur mbështetjen ndaj SPAK.
Jorida Tabaku: Për mua inceneratorët janë çështje e qartë që shkon te kreu i qeverisë. SPAK këtë test ka. Nuk flas dot si doni ju, këtë gjuhë kam.
