Kandidatja për deputete në listën e hapur të PD, Edit’h Harxhi ka deklaruar se shumë shpejt, kreu i demokratëve, Sali Berisha do të vizitojë Shtetet e Bashkuara të Amerikës.
Referuar informacioneve që ajo ka, deklaroi se shpreson që kjo vizitë e Berishës në SHBA të realizohet përpara zgjedhjeve të 11 majit.
Ajo këmbëngul se non grata për kreun e Partisë Demokratike është hequr.
“Nuk ka pasur asnjë provë për Berishën, sepse po të kishte prova do të ishte i dënuar nga Thesari amerikan. Berisha nuk eshte sanksionuar nga Thesari, per kete arsye ai mbetet akt administrativ”, tha ajo.
“Vizita e doktorit do të jetë e shpejtë në Shtetet e Bashkuara të Amerikës. Këtë e kam thënë edhe më parë. Unë them që do të them që është e shpejtë. Ai thotë jo, për sot dhe për nesër, por do të jetë e shpejtë. Unë shpresoj para zgjedhjeve. Informacionet e mia janë të tilla që do shkojë para zgjedhjeve”, tha Harxhi në emisionin Log në News24.
Më tej ajo tha: “Ka ndryshuar administrata amerikane, përqasja ndaj vendeve ka ndryshuar. Trump cdo ditë del dhe thotë që drejtësia në botë ka gjykuar kundërshtarët politike. Kjo ka ndodhur jo vetëm në SHBA, por edhe në Evropë. FBI ka filluar një hetim për ndëshkimin e opozitave në Evropë”.
Ajo tha se sot do të vijë në Shqipëri Chris LaCivita, i cili do të drejtojë ekipin e Partisë Demokratike.
Po ashtu, ajo paralajmëroi se me ardhjen e tij do të ketë surpriza dhe zhvillime të bujshme politike, që sic shprehet “do t’i ndriçojnë rrugën e fitores Partisë Demokratike”
“Zoti LaCivita vjen nesër (sot). Do të drejtojë fushatën gjatë gjithë kohës këtu në Shqipëri. Do të qëndrojë në Tiranë. Do të jetë këtu gjatë gjithë kohës. Ai do të jetë personi që do drejtojë fushatën, do jetë në hapjen e fushatës dhe do të jetë edhe në prezantimin e programit elektoral në datën 12. Me ardhjen e tij mund të ketë edhe ndonjë surprizë, do ketë zhvillime te bujshme, interesante politike që do të ndriçojnë rrugën e fitores së PD”, tha Harxhi.
