Simpatizani i famshëm demokrat, Ilir Vrenozi postoi këtë të martë një foto me kreun e PD, Sali Berishën, pasi refuzoi takimin me kryeministrin Edi Rama.
“Po ndodh…. kafe burrash”, ka shkruar krahas fotos Vrënozi.
Vrenozi një ditë më parë rrëfeu në një intervistë për Top Channel 7 minutat e bisedës me kryeministrin Edi Rama.
Ai u shpreh se u ftua për një kafe private pa kamera nga kryeministri, por ai e refuzoi për shkak të bindjeve të tij të djathta.
Vrenozi tha se nuk mund të ulej në kafe me një person që e ka sharë 12 vite, por nëse ai i shkon për vizitë në shtëpi do ta mirëpriste.
Nga ana tjetër Rama i është përgjigjur deklaratës së demokratit të njohur Ilir Vrenozi, ku ky i fundit ka pretenduar se është ftuar për kafe nga kryesocialisti.
Rama tregoi bisedën me Vrenozin, ku iu drejtua duke thënë “Më the ‘derën e shtëpisë s’ja mbyll dot kryeministrit’”.
“Vrenoz ja ku më ke, ti më tënden je në rregull. Me nja dy lëvizje nga e vërteta. Unë kisha dëshmitar. Halli i madh është me çyrykët e tu Vrenoz. ‘Donte ta blinte Rama’, thanë. Unë nuk e dija që Nikua fliste me ty dhe që ishit miq, këtë e mora vesh dje. Po pinim kafe dje në Pogradec, më tregon videon e një Fidel, dhe pashë në ekran që e pëlqeje dhe ti këtë tipin. Më tregon Nokua dhe i thashë ‘flet ti me Vrenozin’, ‘flas’ më tha”, është shprehur më parë Rama.
