Presidentja e Kosovës, Vjosa Osmani, është takuar me Presidentin e Shteteve të Bashkuara, Donald Trump, dhe Zonjën e Parë, Melania Trump, gjatë ceremonisë së funeralit të Papa Françeskut të mbajtur këtë të shtunë në Vatikan.
Në nisje të ceremonisë, siç shihet edhe nga pamjet e siguruara nga Euroneës Albania, Presidentja Osmani zhvilloi një bisedë të shkurtër me Presidentin amerikan.
Në këtë ceremoni historike morën pjesë 160 delegacione zyrtare nga e gjithë bota.
Delegacioni nga vendlindja e Papës, Argjentina, udhëhiqej nga Presidenti i Republikës, Javier Milei, ndërsa delegacioni italian përfaqësohej nga Presidenti Sergio Mattarella, vajza e tij Laura Mattarella dhe Kryeministrja Giorgia Meloni.
Shqipëria përfaqësohej nga Presidenti Bajram Begaj dhe Ministri për Evropën dhe Punët e Jashtme, Igli Hasani.
Sipas protokollit të renditjes së vendeve, të vendosur në parvisin e Bazilikës së Vatikanit, personalitetet u renditën në bazë të alfabetit francez, gjuha zyrtare e diplomacisë ndërkombëtare.
Në mesin e liderëve të pranishëm ishin gjithashtu Presidenti i Gjermanisë, Frank-Ëalter Steinmeier, me Kancelarin Olaf Scholz; Presidenti i Brazilit, Luiz Inacio Lula da Silva; Presidenti i Francës, Emmanuel Macron me bashkëshorten Brigitte; Presidenti i Hungarisë, Tamas Sulyok me Kryeministrin Viktor Orban; si dhe Presidenti i Ukrainës, Volodymyr Zelenskyy me bashkëshorten Olena.
Bashkimi Europian përfaqësohej nga Presidenti i Këshillit Europian, Antonio Costa, Presidentja e Komisionit Europian, Ursula von der Leyen, Përfaqësuesja e Lartë për Punët e Jashtme, Kaja Kallas, dhe Presidentja e Parlamentit Europian, Roberta Metsola.
Ndërkohë, Organizata e Kombeve të Bashkuara përfaqësohej nga Sekretari i Përgjithshëm, Antonio Guterres, ndërsa Kina ishte e përfaqësuar nga nënpresidenti Chen Chin-Jen.
