Në fokusin e vëmendjes sot është varrimi i Papa Françeskut, i cili nisi në orën 10:00 në Bazilikën e Shën Pjetrit. Ngjarja është një moment historik, me praninë e liderëve botërorë, përfshirë presidentin amerikan Donald Trump.
Ai mbërriti mbrëmjen e djeshme në Villa Taverna nga ku mori pjesë në funeralin e Papës. Para se të fluturonte për në Romë, ai njoftoi se do të takohej me Kryeministren italiane Giorgia Meloni në margjinat e funeralit.
Kryeministrja Meloni ka punuar për një kohë të gjatë për të organizuar një samit SHBA-BE, i cili do të trajtojë çështjen e detyrimeve amerikane për mallrat evropiane, që janë aktualisht të ngrira. Gjatë vizitës së saj të fundit në Uashington, Meloni kishte arritur një marrëveshje me Trump-in për të ardhur në Romë, duke hapur mundësinë e një takimi me liderët europianë. Megjithatë, mbetet të shihet nëse ky samit do të realizohet këtë fundjavë pas funeralit të Papës.
Ministri i Jashtëm italian, Antonio Tajani, ka theksuar se është e rëndësishme që të mos zhvillohen takime politike gjatë ditës së funeralit, duke e konsideruar një mungesë respekti për Papën. Sipas tij, kjo është një ditë për t’u përqendruar te nderimi dhe përkujtimi i Atit të Shenjtë, dhe jo për diskutime politike.
