Kryeministrja italiane Giorgia Meloni ka hedhur poshtë lajmet në mediat vendase, që u përhapën pak ditë më parë, se ajo kishte në plan që të blinte një vilë në zonën e Palasës në Shqipëri. Meloni, në një reagim për “Corriere” është shprehur e tronditur për këtë lajm, që sipas saj nuk është i pari informacion i rremë që shpërndahet kundër saj.
“Nuk është absolutisht e vërtetë”, është shprehur e tronditur Meloni sipas Corriere Della Sera, ndërsa ka shtuar: “kush do ta besonte që gjëra që as nuk i kam menduar ndonjëherë mund të jepen si lajm”.
Pak ditë më parë ishte gazeta Il Foglio, ajo e cila publikoi një artikull sipas të cilit kryeministrja italiane po blinte një vilë me pishinë në bregdetin e Palasës. Sipas gazetës, e cila i referohej burimeve politike dhe diplomatike nga Tirana, investimi i Melonit do të çimentonte edhe më tej marrëdhenien e saj me kryeministrin shqiptar Edi Rama.
Lajmi u përcoll edhe nga shumë media të tjera duke u lidhur edhe me ndërtimin e Qendrave të Emigrantëve në Shqipëri, në sajë të marrëdhënies mjaft të afërt mes dy kryeministrave të vendeve tona. Me pak fjalë, blerja hipotetike e vilës në Shqipëri do të ishte (edhe) një lloj favori nga Meloni për Ramën (ose anasjelltas). Por sipas Corrieres të gjitha këto janë të pavërteta dhe pjesë e një fushate shpifje mbi kryeministren italiane.
Po ashtu vetë Meloni është shprehur se mediat duhet të marrin më shumë kohë në verifikimin e informacioneve, pasi së fundi shumë shpifje dhe baltë janë hedhur në drejtimin e saj. /ZËRI
