Gazetari Berat Buzhala dhe media që ai drejton, Nacionale, eyt kanë trajtuar vrasjen natën e të premtes në Ferizaj, si një hakmarrje ndaj abuzimit seksual që u është bërë dy vajzave të mitura nga viktima gjatë kohës së luftës, duke implikuar edhe presidenten Vjosa Osmani, e cila sipas tyre ka qenë në dijeni por nuk ka reaguar. Pas kësaj, fillimisht shefi i stafit të Presidentes Vjosa Osmani, Bekim Kupina, ka reaguar në lidhur aktin e kryer nga efektivi i Policisë, Festim Ramadani i cili ekzekutoi me armë zjarri të afërmin e tij Sadri Sadriun. Ky i fundit është njëkohësisht edhe xhaxhai i presidentes Osmani. Sipas informacioneve të pakonfirmuara që dolën në mediat e Kosovës, vrasja ndodhi nën dyshimet për “ngacmim seksual” të dy vajzave, (familjare të policit të dyshuar Festim Ramadani), nga ana e viktimës. Po ashtu u raportua se bashkëshorti i Vjosa Osmanit dhe kjo e fundit ishin futur në një grup komunikimi në Facebook, ku familja Ramadani kishte rrëfyer gjitha pretendimet e tyre për tashmë viktimën Sadri Sadriu, për situatën e ndodhur.
Shefi i stafit të Presidentes Osmani, Bekim Kupina, cilëson se “kjo tendencë është me qëllim të qartë denigrimi dhe rrezikimi të jetës së Presidentes dhe familjes së saj të ngushtë”. Ai tha se “Presidentja është në kontakt të vazhdueshëm me institucionet e sigurisë në mënyrë që ky plan i qartë për rrezikimin e jetës së saj e të familjes të trajtohet me prioritet”. Kupina tha se çifti Sadriu nuk përdorin “asnjë grup komunikimi në asnjë rrjet social”.
“E gjithë kjo është shpifje me qëllim të implikimit të Presidentes në situata për të cilat as nuk ka njohuri e as lidhje. Presidentja dhe as Zotëria i Parë nuk përdorin asnjë grup komunikimi në asnjë rrjet social. Kjo është tërësisht e pavërtetë dhe tendencioze. Kjo tendencë është me qëllim të qartë denigrimi dhe rrezikimi të jetës së Presidentes dhe familjes së saj të ngushtë. Presidentja do t’i kundërshtoj me çdo mjet ligjor këto tendenca dhe tashmë ka kërkuar nga institucionet e sigurisë që ta trajtojnë këtë me urgjencë. Tendenca për të ndërlidhur rastin e mbrëmshëm me Presidenten dhe familjen e saj të ngushtë e shndërron atë në një objektiv, duke vënë në rrezik jetën e tyre. Kjo nuk ka të bëj me standard profesional të raportimit në media. Presidentja është në kontakt të vazhdueshëm me institucionet e sigurisë në mënyrë që ky plan i qartë për rrezikimin e jetës së saj e të familjes të trajtohet me prioritet”, tha Kupina.
Po ashtu edhe vetë presidentja e Kosovës, Vjosa Osmani me anë të një postimi në rrjetin social Facebook, ka mohuar lidhjen me ngjarjen. Osmani shkruan se ajo dhe bashkëshorti i saj nuk kanë asnjë njohuri e asnjë lidhje me rrethanat që çuan në vrasjen e mbrëmshme. Gjithashtu ajo ka atakuar me emër edhe gazetarin Berat Buzhala dhe medien që drejton, për të cilat ka paralajmëruar edhe padi në organet e drejtësisë. Nga ana tjetër Buzhala është kundërpërgjigjur se posedon ka fakte që vërtetojnë se presidentja ka qenë në dijeni të abuzimit të dy të miturave nga xhaxhai i bashkëshortit të saj prej kohësh, por në vend që të ndiqte rrugën e institucioneve është përpjekur që ta mbulojë ngjarjen e rëndë. Presidentja Osmani me reagimin e saj, faktikisht ka hapur një debat të nxehtë në opinion dhe skandali duket se sapo ka shpërthyer.
“Reagim ndaj propagandës. Pasi i kam njoftuar institucionet e sigurisë dhe jam në përgatitje e sipër të të gjitha mjeteve ligjore, po e bëj publik edhe këtë reagim ndaj publikimit të propagandës së paprecedentë që ka filluar Berat Buzhala dhe media e tij, gazeta online “Nacionale”, e që po vazhdon edhe nga disa portale të tjera. I njoftoj qytetarët e Kosovës se asnjë njohuri e asnjë lidhje me rrethanat që shpien në vrasjen e mbrëmshme nuk kam as unë e as bashkëshorti im, e aq më pak njohuri për ndonjë rast dhunimi”, ka shprehet presidentja e Kosovës, ndërsa shton se institucionet e sigurisë dhe drejtësisë duhet të merren me këtë rast.
Policia e Kosovës ka dhënë detaje lidhur me vrasjen që ndodhi mbrëmjen e djeshme, ku thotë se efektivi ka qenë jashtë detyrës zyrtare. Festim Ramadanit, vëlla i dy vajzave që akuzojnë se janë abuzuar nga burri i tezes në kohën e luftës kur ishin strehuar në shtëpinë e tij në Luginën e Preshevës, u vetëdorëzua në Polici. Kurse disa orët pas ngjarjes është vënë në pranga dhe një bashkëpunëtor i tij.
