Zgjedhjet parlamentare të 11 majit kanë tërhequr edhe vëmendjen e mediave të huaja. “Shqipëria voton ndërsa kryeministri Rama kërkon mandatin e katërt, duke premtuar integrimin në BE”, ky është titulli i Reuters. Agjencia citon edhe sondazhet që e nxjerrin kryesocialistin fitues me deri në 50% të votave.
“Sipas disa matjeve, Rama ka performuar mirë. Rritja ekonomike vjetore mbi 4% për vitet 2022-2024, e nxitur nga tregtia me BE-në dhe një bum turizmi, i tejkaloi vendet e tjera të Ballkanit, thotë Banka Botërore.”, thuhet në artikullin e Reuters.
Al Jazeera shkruan; “Rama, udhëheqës i Partisë Socialiste në pushtet që nga viti 2013, e ka pozicionuar veten si arkitekti i së ardhmes së Shqipërisë në BE. Ai është zotuar se vendi do t’i bashkohet bllokut deri në vitin 2030, duke përsëritur premtimin në tubimin e tij të fundit: “Ne do të marrim mandatin tonë të katërt dhe nuk do të humbasim asnjë ditë për Shqipërinë 2030 në BE”.
Washington Post i ka kushtuar gjithashtu një artikull zgjedhjeve në Shqipëri. Gazeta amerikane ndalet edhe te termat e përdorura gjatë fushatës. “Rama e përshkroi Berishën si një “buf kënete” – një metaforë për korrupsion – ndërsa Berisha e quajti Ramën një “kryegangster”, thuhet në artikull.
Euronews e nis artikullin me epërsinë që ka Rama në sondazhe. “Sondazhet tregojnë se Rama, i cili ka premtuar anëtarësim në BE në pesë vitet e ardhshme, ka një epërsi të madhe ndaj rivalit të tij të vjetër Sali Berishës, i cili është dobësuar nga një hetim për korrupsion.”, shkruan kjo media.
