Se sa janë të rëndësishëm, këtë e dimë mirë. Ardian Ismajli, Mario Mitaj e Marash Kumbulla mund të quhen themeli I kombëtares kuqezi, sepse suksesi I një ekipi nis nga mbrojtja.
Gjithsesi, ekipi përfaqësues duket I sakatuar pikërisht në “segmentin” e tij më delikat, në prag të dy ndeshjeve e para eliminatore të Kupës së Botës.
Mitaj është jashtë, madje ka bërë edhe operacion në Londër, ndërsa dy lojtarët e tjerë difensivë janë në dyshim të madh për Anglinë, e ndoshta edhe për Andorrën.
Ismajli e nisi seancën stërvitore me kuqezinjtë, por pastaj ndaloi duke shfaqur sërish problemet që ka pasur me skuadrën e tij, Empolin.
Pra, qendërmbrojtësi nuk mundi ta realizonte përgatitjen sipas planit, dhe duhet parë nga stafi mjekësor se në çfarë gjendjeje është.
Kumbulla, ndërkaq, po ndjek një program individual stërvitor, dhe shpresa është të kthehet me grupin, veçse koha kalon dhe ndeshja është shumë afër, këtë të premte.
Nuk dihet nëse lojtari I Saragozës në Spanjë do të mundet të bashkohet me ekipin dhe të bëhet pjesë e sfidës.
Për fat, të paktën, është kthyer Gjimshiti.
Kapiteni, që po zhvillon një sezon të madh me Atalantën në Serinë A në Itali, është në formë shumë të mirë, ndonëse nuk duhet harruar se edhe ai ka pasur probleme muajt e kaluar.
Për shkak dëmtimi, 31-vjeçari nuk ishte në asnjë nga 6 ndeshjet e edicionit të Ligës së Kombeve.
