Zëvendëspresidenti amerikan, JD Vance dhe gruaja e tij Usha kanë zbarkuar në bazën hapësinore ushtarake Pituffik në Groenlandën veriperëndimore.
Sapo kanë mbërritur në Groenlandë, ata kanë hipur në një automjet të blinduar të SHBA-së.
Ndërsa gjatë vizitës në bazë, Vance tha se “shumë amerikanë e pyesin pse Groenlanda ka kaq shumë rëndësi”.
“Nëse një raketë do të lëshohej nga një vend armik në SHBA, janë njerëzit këtu përpara nesh ata që do të njoftonin burrat dhe gratë e guximshme më në jug në SHBA për t’i njoftuar se çfarë po ndodhte”, tha zëvendëspresidenti.
Gjithashtu, ai njoftoi se Rusia dhe Kina po interesohen për kalimet e Arktikut. “Ne duhet të sigurohemi që Amerika të udhëheqë në Arktik”, shton ai.
Vance më pas pyetet për sugjerimin e Donald Trump se SHBA mund të përdorë forcën ushtarake për të marrë kontrollin e Groenlandës nëse është e nevojshme, shkruan skynews.
Ai me sa duket kërkon të minimizojë potencialin për një zhvillim të tillë – por, veçanërisht, nuk pranon ta përjashtojë atë.
“Presidenti ka thënë qartë se nuk mendon se forca ushtarake do të jetë e nevojshme, por ai beson absolutisht se Groenlanda është një pjesë e rëndësishme e sigurisë, jo vetëm e SHBA-së, por e botës dhe, natyrisht, edhe e popullit të Grenlandës”, thotë ai.
I pyetur nëse janë hartuar plane për të përdorur forcën ushtarake për të marrë nën kontroll Groenlandën, ai tregon se Shtëpia e Bardhë ka planifikuar të presë që njerëzit e territorit të votojnë për vetëvendosje përpara se të veprojë.
“Epo, ajo që ka thënë presidenti është se ne duhet të kemi më shumë pozicion në Groenlandë”, tha ai.
