Sekretari i Shtetit i Shteteve të Bashkuara të Amerikës, Marco Rubio, dërgoi një mesazh të fortë për unitetin dhe vazhdimësinë e pranisë amerikane në NATO, duke theksuar se pjesëmarrja e trupave amerikane në stërvitjet e përbashkëta është prova më praktike se “Shtetet e Bashkuara janë në NATO, aq aktive sa nuk kanë qenë kurrë më parë “.
Duke iu përgjigjur kritikave dhe shqetësimeve që janë shprehur ndërkombëtarisht për qëndrimin e Uashingtonit ndaj Aleancës, Rubio theksoi se kjo është “histeri dhe ekzagjerim”, duke hedhur poshtë çdo skenar distancimi nga NATO.
Kreu i diplomacisë amerikane mbrojti qëndrimin e Presidentit Donald Trump ndaj NATO-s, duke theksuar: “Presidenti Trump e ka bërë të qartë se ai e mbështet NATO-n. SHBA do të qëndrojnë në Aleancë, kjo është e qartë.”
Megjithatë, ai shtoi se Uashingtoni kërkon të shohë “një NATO më të fortë, më të qëndrueshme që investon në mënyrë thelbësore në sigurinë kombëtare.
“Trump nuk është kundër NATO-s”, vazhdoi ai. “Është kundër një NATO-je që nuk ka aftësitë e nevojshme për të përmbushur detyrimet që dalin nga traktati për çdo shtet anëtar”.
“Askush nuk pret që gjithçka të bëhet brenda një ose dy vjetësh,” tha ai.
“Por drejtimi duhet të jetë i qartë dhe angazhimi thelbësor”, përfundoi Marco Rubio
